Kar tir lama India chhim lam vaukam hruttu cyclone avangin Chennai khawpui chu tuiin a chim phah nasa hlea, nunphung a la pangngai hlei thei lo.

Thuneitute chuan khawpui dai vela chenna in leh khawlaia tui tlingte then tumin hma a la mek zel.

Mi thenkhat chuan ni tin mamawh pawh an lam thei lo niin an sawi a, power supply an nei that loh avangin a buaithlak hle tih an sawi bawk.

Khawpuia Chennai hmangtu, Tamil Nadu-ah hian ruah sur kaihhnawiha chhiatna thlengah mi 18 vel thi an awm tawh.

Cyclone Michaung hi Thawhlehni tukah khan an thenawm, Andhra Pradesh-ah khawmual lutin naupang a thi a, depression-a a inleh hmain thlai chin a tichhe nasa hman hle bawk.

Thawhtanniah khan Chennai-ah hian ruah cm 24 a sur hman a, India-a meteorological department chuan ni khata cm 21 chin chung lam hi 'nasa tak' tia chhinchhiah a ni.

Tun tuma India-a khawpui lian ber zinga mi, industry hmunpui ni bawk, Chennai-a ruah tam tak sur hi kum 2015-a nasa taka a sur tuma mi 200 chuang an thihna nen khan khaikhin hial a ni a. Mi thiamte chuan Indian khawpui tam tak hi in sak leh siam leh hmasawnna hna thawha ruahmanna mumal a awm loh avangin khaw awm dan uchuakah hian an tuar na fo dawn niin an sawi.

Thawhtanniah khan Chennai thlawhna tumhmun lun tak chu a tlan kawng tuiin a chim avangin khar a ni a. Ni thum liam ta chhungin rel tam tak zin tur thulhtir an ni bawk a. Mint chanchinbu chuan company tam tak khar a ngaih avangin sum lama tawrhna phei chu 'nasa tak' a ni thei dawn niin a tar lang a. Khar zingah hian Apple supplier Foxconn pawh a tel.

Ningani khan Chennai khawpui hotute chuan khawpui chhim lama tui tlingte chu lirthei a kal theih nan khawl hmangin an paih tan bawk.

Greater Chennai Corporation Commissioner J Radhakrishnan, chuan 'darkar 26 zet ruah sur ang zet vel tui an pump tawh' tih BBC Tamil hnenaha sawi a. Nilaini zanah kha chuan khawpui hmun lia thenkhata hmun thumah chuan tui a kam tawh niin a sawi bawk.

Ni thum liam ta chhungin mi sang tel relief camp-ah sawn chhuah an ni a, thenkhat hi chu an chenna in tuiin a chim avanga rubber leh fibre boat hmangin chhanchhuah an ni a. Tui in tur thianghlim lakna chhiate siam that mek zel a ni bawk.

Mi thiamte chuan ruahmanna mumal awm lova thil sak ringawtin ruah tui luanna tur a tibuai a, a luang ral chak lo niin an sawi.

"Chennai hmun thenkhatah hian inte hi lei nemna, dil hnaih tak takah sak a ni a, ruah a sur hian tui a lian hma em em bik a ni," tiin khawpuia tui lian thin zirtu, David Manohar chuan BBC Tamil a hrilh.

Tamil Nadu sorkar chuan sorkar laipui hnenah puihna Rs. Vaibelchhe 50 a dil nghal a. Chief Minister MK Stalin chuan X-ah an tuar na hle tih a tar lang.