Cyclone tha chak takin a ken tel ruah tam tak leh thlipui chak takin India chhim lam tuipui kam a hrut a, mi eng emaw zat an thi tih sawi a ni.

Tamil Nadu leh Andhra Pradesh-ah chuan hmun hniam laia cheng mi sang tam tak chu hmun him zawkah sawn chhuah a ni.

Chennai khawpuia mihring chenna hmun tam tak chu tuiin a chim a, lirtheite pawh tuiin a len a, thingkung eng emaw zat a tlu bawk.

Chennai thlawhna tumhmun, India-a lut chhuak tam ber pawl ni phak pawh Thawhtanniah khan khar rih a ni.

Chengalpattu-ah chuan ruah sur nasa avanga kopang chimin mi pahnih a delh hlum niin Reuters news agency chuan a tar lang.

Darkar khata km 110 thlenga chak thlipui keng thei Cyclone Michaung Thawhlehni tukah Andhra Pradesh-a Nellore leh Machilipatnam inkarah tuipui atanga khawmual kai tura sawi lawk a ni.

Khawchin zirtute chuan Tamil Nadu leh Andhra Pradesh-a hmun eng emaw zatah inralrinna dar khawn niin Thawhtanniah khan sikul, college leh bank khar tawh niin Thawhlehniah pawh hian district paliah khar chhunzawm a ni ang.

Electronic leh thil dang siam chhuahna hmun, iPhone siam chhuahna hmunpui pawh a awmna, Chennai khawpui chhung leh a chhehvela factory-te chu khar a ni hlawm tih Reuters hian a tar lang bawk.

December, 2015 khan Chennai khawpuiah hian tui lian avangin mi 400 vel an lo thi tawh.

Darkar 24 liam ta chhungin Tamil Nadu, Rayalaseema leh Andhra Pradesh-ah ruah tam tak a sur tawh a, heng hmun thum bakah Telangana leh Odisha-ah thli leh ruah a thawk dawn niin sawi lawk a ni bawk.

India-a meteorological department chuan Andhra Pradesh chhim lam leh Tamil Nadu hmar lam leh Puducherry-ah chuan mite chu pawn chhuak lova ina awm turin an ngen hlawm.

Chenna in chhe thei a nih avangin mite fimkhur turin an inngen a, sangha mantute pawh tuipui kam hrul leh tuipuiah chhuak rih lo turin an ngen.

Bay of Bengal hmun thenkhatah pawh thlipui thawk thei tia sawi lawk a ni bawk.

Andhra Pradesh hmun thenkhat chuan darkar 24 lo awm leh tur chhungin ruah cm 20 chuang an dawng dawn nia sawi lawk a ni.

Chennai hmun thenkhatah chuan darkar 24 liam ta chhungin ruah cm 25 a sur tawh a, Perungudi chu a sur tamna ber niin cm 29 a sur tawh.

Tamil Nadu-ah hian vaukam district atangin mi 7,000 dawn hmun himah suan chhuah an ni tawh a, cyclone kalkawnga awm mi 21,000 vel sawn chhuah hmabak an la awm niin Reuters chuan a tar lang.

Hetih lai hian Punjab, Haryana, Chandigarh, Uttar Pradesh khawthlang leh Rajasthan khawchhak lamah chhum chhah tak zing thei tura sawi lawk a ni bawk.

Nilaini tukah chuan khaw awm dan uchuak tak hi a reh fel tawh tura ngaih a nih thu sawi a ni bawk.