Cyclone tha chak takin tuipui atangin India chhim lama Andhra Pradesh-ah khawmual a lut a, ram tam tak leh thli na tak a thlen.

Andhra Pradesh leh an thenawm, Tamil Nadu-ah ruah sur nasa avanga chhiatna thleng kaihhnawihah naupang telin mi pakua an thi.

Thuneituten state pahnihah hian hmun hniama cheng mi sang tel hmun himah an sawn bawk.

Mihring chenna hmun tam tak tui lianin a chim a, video darhah chuan tuiin lirtheite pawh a len.

Cyclone Michaung hian Andhra Pradesh-a Nellore leh Kavali inkarah khawmual a kai niin chief minister pisa chuan a sawi a. India Meteorological Department (IMD) chuan darkar khata km 110-a chak thlipui keng thei niin a sawi lawk a, khawmual a kai hnu lawkah hian a zuih ral zui dawn niin an sawi lawk bawk.

Andhra Pradesh-ah hian relief camp 211-ah mi 9,500 vel khawsak lailawktir mek an ni.

“Andhra Pradesh-ah hian ruah tam tak a la sur chhunzawm dawn a. Nilaini tukah chuan depression-ah a tlahniam tawh ang,” tiin IMD Director General Mrutyunjay Mohapatra chuan thuthar lakhawmtute hnenah a sawi.

Tirupati district, Andhra Pradesh-a bang chim avangin mipa naupang kum li mi a thi niin sorkarin a puan chu tual chhung chanchinbuten an chhuah chhawng a. Tamil Nadu-ah Thawhlehni khan mi pariat an thi bawk a, thenkhat hi in chim leh electric mante an ni hlawm.

Khawchin zirtutr chuan Tamil Nadu leh Andhra Pradesh-a hmun tam takah inralrinna dar an khawng a. Sikul, college leh pisa tam tak chu district eng emaw zatah an khar.

Andhra Pradesh-ah hian rel leh thlawhna eng emaw zat chu an zin tur thulhtir an ni a, thlai hmun chhia pawh a awm nual bawk nia sawi a ni.

Bay of Bengal vaukama awm, Telangana leh Odisha-ah chuan hmun eng emaw zatah ruah leh thli thawk tur sawi lawk a ni a. Thuneitute chuan sangha mantute chu tui a phul nasat dawn avangin tuipuia chhuak rih lo tura tiin chenna in pawh chhia a awm thei tih an sawi lawk.

Thawhtanniah khan Tamil Nadu-ah chuan vaukam hrul district-a ruah leh thli tam tak karah mi 7,000 zet hmun himah sawn chhuah an ni.

India-a thlawhna tumhmun lun ber pawl, Chennai thlawhna tumhmun pawh Thawhtanniah khan a tlankawngah tui a tam lutuk avangin khar a ni a. Thawhlehni tukah khan cyclone hian hmar lam a pan bakah ruah pawh a tlak tlem deuh tak avangin hawn leh tawh a ni.

Electronic leh thil dang siam chhuahna hmunpui, Chennai leh a chhehvela factory eng emaw zat chu Thawhtanni khan khar a ni bawk tih Reuters chuan a tar lang a. Heng zingah hian iPhone siam chhuahna hmunpui pawh khar a ni.

Chennai khawpuiah hian ruah a han tawh hnuah pawh hmun eng emaw zatah tui a tling a, hei hian veivah pawh a tibuaithlak deuh va. Mi thenkhat chuan power leh tui an hmuh loh avangin an buai tih an sawi bawk.