India chu khawvela ni khata coronavirus hri kai hmuh chhuah mi 4,00,000 awmna hmasa ber a ni ta a. Hetih lai hian ram pumah puitling chin tana invenna damdawi pek tan a ni a, hmun tam takah damdawi indaih lohna thawm erawh a ri ring hle.

Darkar 24 liam ta chhungin mi 3,523 zetin an thihpui leh hman bawk a, heti chung hian thih chhan finfiah loh tam tak a awm avangin hei aia tam daih hian an thihpui rin a ni.

India-ah hian hri leng laka invenna pek chu sorkar laipui ruahman angin nimin atang khan kum 18 tling chin tan a kalpui tan bawk.

Hetih lai hian state tam tak chuan damdawi pek chhuah tur an neih loh thu an sawi.

India-ah hian hri leng beihnaa a hmatawnga thawk leh kum 45 chung lam chin hnenah invenna hi a lo pe tawh a. Oxygen leh damdawi in khum indaih lohna a nasa hle bawk.

India-ah hian invenna damdawi hi dose maktaduai 150 chuang pek a ni tawh a, mihring tluklehdingawn 1.3 zinga 11.5% hnenah chauh pek an la ni.

Invenna damdawi siam chhuak tam ber ra ni mah se ram chhungah indaih lohna a nasa hle a, ram chhunga hman tur a indaih theih nan AstraZeneca chu thawn chhuak lo tura tih a ni.

Nimin atanga kum 18 leh 44 inkarte hnena pek tan turah lak tum mi maktaduai 13 chuang an inziak lut tawh a; mahse, state tam tak - Madhya Pradesh leh Maharashtra pawh huamin, sorkar laipuiin tan hun tur a tihah an tan thei lo tih an sawi.

Delhi Chief Minister Arvind Kejriwal pawhin thalaite chu invenna lak tuma chhuak lo turin a ti a, khawpui ber hian damdawi a dawn hma chuan a pe chhuak thei lo tih a sawi. "Vaccine a lo thlen veleh kan hrilh che u ang a, in lo kal dawn nia. Vaccine centre hi ni reilo te hnuah a pan khawm theih ang,” a ti.

Mi thiamte chuan India hian hri inkai darh chak lutuk karah invenna pekna hmun a din belh teuh a ngaih thu an sawi.

University of Michigan-a biostatistician Bhramar Mukherjee chuan India hian ni khatah dose maktaduai 10 tal a pek chhuah hman a ngai a, tuna maktaduai thum vel chauh a pek chu a tawk lo tih a sawi.