Aizawl: Mizoram Pradesh Youth Congress Committee (MPYCC) chuan District thar pathum Khawzawl, Saitual leh Hnahthiala Medical Officer (Doctor) ni lai te chu Chief Medical Officer (CMO) leh District Medical Superintendent (DMS) ni kawp turin sawrkar chuan dan pel in a ruat niin an sawi.            

Nimina thuchhuah an siamah MPYCC chuan Secretary to the Government of Mizoram, Health and Family Welfare Department chuan February ni 2, 2022 khan 'Notification' tichhuakin he ruatna hi a tichhuak niin an sawi a. 'Medical Doctor senior tawh tak takte an awm laia hetianga kalphung pangngai ni loa sorkarin CMO leh DMS atana MO te a remchan vanga a ruat ngawt mai hi service in zah lohna lian tak a tling a. Kalphung dika siamtha vat turin kan phut a ni,' an ti.

MPYCC chuan CMO leh DMS chu nihna hrang hlak a nih avangin khawi hmunah mah nih kawp tir an ni ngai lo nia sawiin, DMS-te phei chu 'senior specialist' ten an chelh tlangpui niin an sawi a. District pathum tana CMO leh DMS post siam (create) dilna chu DP&AR lamin phal tawh mah se siam a la ni lo nia sawiin, "Hetianga 'post' pawh siam chuang lova duh duha sorkarin kalphung kalha nihna a ruat hi, MNF Ministry-ten mipui an tham loh zia a tilang a. District neitute tan pawh hian 'post create' lo va, hetianga Medical Officer an neih laite CMO leh DMS atana ruat an ni ringawt hi a tlawm thlak hle a ni," an ti a. "Mizoram sorkar hian Health & Family Welfare Dept. hi a ngai pawimawh a nih chuan 'post' hi 'create' sak mai se, a tling leh a chelhtu tur dik takin heng CMO leh DMS hna hi chelhtir rawh se. An 'service' duh tho si, an mahni ngaih pawimawhna nei si lova dan lova an kalpui mai mai hi a pawi tak zet a ni," an ti bawk. MPYCC chuan post thar siam lo a, a awmsa atanga a siamrem ringawt thin hian thawktu indaih lohna nasa takin a ti zual thin niin an sawi bawk.