Aizawl:National Institute of Rural Development and Panchayati Raj, Ministry of Rural Development buatsaihin nimin khan Azadi ka Amrit Mahotsav pualin Deen Dayal Upadhyaya Grameen Kaushalya Yojana (DDU-GKY) hnuaia pianphunga rualbanlo (Persons with disabilities) candidate training zo tawh leh kum khat aia tlem lo hnathawk tawh te chawimawina leh Award hlanna hun neih a ni a. DDU-GKY hnuaia pianphunga rualbanlo (PwD) Candidates State hrang hrang a Award dawng tura thlan chhuah te zingah Mizoram atangin Lallawmzuala, Chawngtlai, Khawzawl District chu a tel. 

Zirtawpnia virtual Award Ceremony hi Secretary, Ministry of Rural Development ho va neih niin, Mizoram atangin Mizoram State Rural Livelihoods Mission (MzSRLM) Officials te leh Project Implementing Agency (PIA), eCentric leh Award dawngtu Lallawmzuala ten an lo chhim ve ani. He Programme ah hian award hi H.Lalchhandami, Chief Executive Officer, MzSRLM in Lallawmzuala hnenah hian a hlan a ni.

DDU-GKY hi Ministry of Rural Development, Govt. of India hnuaia project pakhat niin he Scheme hnuaiah hian thingtlang thalai kum 18 atanga kum 35 inkar te a thlawnin training (Skill training) pek niin, training an zawh hnuah hna an thawh awm zawn sak thin an ni. Tun dinhmunah hian MzSRLM chuan DDU-GKY hnuaiah hian thingtlang thalai 761 train chhuak tawhin mi 461 hna hmuh an hmuh sak tawh a, hna an hmuhsak zingah hian Persons with disabilities candidates 8 an awm a ni.