Delhi-a Gokulpuri venga puan in awmna hmuna Inrinnia kangmei nasa tak chhuakah mi pasarih an kang hlum a. Puan in zar 60 vel zet a kang ral vek.

Kangthelhtute chuan zing dar 1:00 velah kangmei a chhuah avanga kohna an dawng a. Kangthelhna 13 nen thawk chhuakin darkar rei vak lo chhungin an timit thei.

“Ruang pasarih, tute nge an nih pawh hriat loh hai chhuah tawh a ni a, a kan lai hian a chengte hi an mut lai a ni a, rang taka a inman kai bawk si avangin an tlan chhuak hman lo va. Puan in 60 vel a kang chhe vek a, a kan chhan hi hriat mai theih a la ni lo,” tiin Delhi Fire Director Atul Garg chuan ANI a hrilh.

Chief Minister Arvind Kejriwal chuan a tawrhpui thu sawiin thi chhungte pawh a tlawh nghal a. Thite hi ral an nih tur thu a sawi bawk.

“Delhi sorkar chuan puitling thite hi Rs nuai 10 theuhvin a ral dawn a, naupangte hi Rs nuai ngaa ralin an in kangte hi Rs 25,000 theuh pek an ni ang,” tiin Kejriwal chuan a sawi.

Prime Minister Narendra Modi pawhin pawi a tih thu a sawi a, “Delhi-a Gokulpuri-a kangmei a chhuak hriat hi a hrehawm a. Thi chhungte ka tawrhpui tak zet a, an lungngaihnaah Pathianin awmpui se ka ti,” tiin a sawi.