Indian khawpui ber, Delhi-a boruak bawlhhlawh zual zel avangin sorkar chuan pawl nga leh a hnuai lam zawngte chu tun kar zawng sikul chawlh puan a ni leh ta a. Pawl ruk leh 12 inkarte erawh chawlh puang lo mah se an duh zawk a nih chuan online class kal turin sikulte a ti bawk.

Delhi sorkar hian Pathianni thleng khan pawl nga leh a hnuai lam chawlh a lo puang tawh a. Boruak dinhmunin ziaawm lam aia zual lam a pan zel avangin chawlh hun a pawt sei leh ta a ni.

“Boruak bawlhhlawh dan a la sang reng a, Delhi-a primary school-te chu November 10 thleng an chawl dawn a ni. Pawl 6-12 inkarte pawh an duh zawk a nih chuan online class-a kal zawk turin thutlukna an siam thei ang,” tiin Delhi Education Minister Atishi chuan thu chhuah a siam.

Delhi-ah hian ni ruk chhung chu a zawnin boruak a bawlhhlawh tak zet a, Pathianni tukah pawh khan Air Quality Index (AQI) chu 460 zet a la ni.

Nilengin boruak bawlhhlawh zing chungin Delhi hi a tuam zui a, doctor-te pawhin thawk lam leh mit lamah hasarna neih phah an awm tam dawn niin an sawi lawk a, a bikin naupang leh upa lamah a ni zual thei tih an sawi.

Microscopic PM2.5 particle an tih, boruaka bawlhhlawh, hip luha chuapa tanga hrisel lohna hrang hrang thlen thei tam zawng chu sorkarin a him chin a tih, cubic metre khat biala microgram 60 awm tur chu a let sarih leh riat vel zetin Delhi-NCR hmun tam takah tun hnai khan a awm a. WHO-in a duhthusam, cubic metre biala microgram nga chauh awm tura tih phei chu a let 80 atanga 100 inkar zetin a pel zawk.

Sorkar laipuiin Delhi-NCR huam chhunga boruak bawlhhlawh lutuk tihziaawm nana hma lak dan tur a zam, AQI 450 a pelha hman tura tih pawh kalpui mek a ni a. Heng zingah hian khu nei nasa truck tlan loh te, ke li nei chi sumdawng lirthei tlan loh te leh in sakna lam thil engmah tih loh te pawh a tel.

Delhi-NCR boruak hi chawlhkar liam ta atang khan a bawlhhlawh zual tan a. Hei hi khua a vawh tan avang te, boruak bawlhhlawh chhem bo tur thli a thawt that loh vang te leh an thenawma Punjab leh Haryana-a lo neituten an lo an halna khu a luh nasat vang te a ni.

Delhi-a AQI hi October 27 leh November 3 inkar chhung khan point 200 chuang zetin a sang hman a, Zirtawpni khan ‘severe plus’ category (450) chung lam a tlin thu Central Pollution Control Board (CPCB) chhinchhiahnaah tar lan a ni.

Zirtawpni tlai dar 4:00-ah khan ziaawm hretin 468 atangin dar Inrinni zing dar 6:00-ah chuan 413-ah a tla a; mahse, Zirtawpni nileng khan 468 ang vel a ni reng a, November 12, 2021 hnua a san leh ber a ni.

Delhi khawpui boruak hi khawvel khawpui zingah bawlhhlawh ber a tling phak a. University of Chicago-in report a siamah phei chuan boruak bawlhhlawh hip luh nasat hian kum 12 vel zetin mihring dam chhung a titawi thei niin an tar lang.