India khawpui ber, Delhi leh hmar lam hmun thenkhat chu khaw vawt vin tak leh chhum leivak chhah takin a tuam mek a, zin veivah pawh a tibuai hle.

Khaw hmuh theih chin a tawi em avangin khawpui berah hian thlawhna 100 chuang leh rel 25 che vel tur chu an hun bi tiamah an che thei lo.

Khawpui ber hian tun thlasika chhum a zin nasat ber tum tawngin Nilainiah khan khaw hmuh theih chin chu metre 50 hnuai lamah a tla a ni.

Zingkarah chhum leivak chhah takin a tuam avangin lirthei a kal chak thei lo va, hmun thenkhatah chetsualna thlen phah pawh a awm nual.

India hmar lam hmun dangah pawh lirthei chesual an awm tih sawi a awm bawk.

An thenawm, Uttar Pradesh-ah chuan Nilaini tuk khan expressway lun takah lirthei eng emaw zat an insu a, an state pum hi chhum leivakin a tuam mek.

Thlalak leh video thehdarhah chuan lirtheite chu kawngpui hmuh theih mang lova che sawn hlei thei lovin an intlar put tih hmuh theih a ni a. Lirthei chesual avang hian hliam tuarte pawh an awm a; mahse, nunna chân em erawh an awm hriat a ni lo.

India hmar lamah hian thlasik laia chhum leivak zin vak hi thil thleng pangngai a ni a, hmar lamm bakah ram laili hi khaw vawt vin takin a tuam ziah bawk.

Khaw vawt hian hmar lam state thenkhat - Punjab, Haryana, Uttar Pradesh, Madhya Pradesh, Rajasthan leh Kashmir te a la tuam chhunzawm rih dawn nia sawi a ni.

India-a khawchin zintute chuan inralrinna dar khawngin ni nga lo awm leh tur chhung hian chhum a la zing nasa dawn niin an sawi bawk.

Weather department chuan mipuite chu lirthei khalh fimkhur turin an ngen a, kawngpui an hmuh thui theih zawk nan chhum zinga hman chi êng (fog light) hmang tam turin an ngen bawk.

Rikrum leh thil pawimawh bik tak a nih loh chuan pawn chhuak tam lo turin an ngen a, an chhuah pawhin hmai tuam tha turin an ngen bawk.

Khaw vawt uchuak tak thleng thin hi India-ah hian chenna nei lote tan a hrehawm zual thin a, hengho hi kawngpui leh rel station-ah an riak mai mai thin a ni.