Indian maktaduai telte chuan Pathianni khan an rama kut pawimawi ber pakhat, Diwali, Hindu sakhuaa êng kût an lawm.

A lawmtute hi an tawngtai a, kût ruai an theh a, hal mawi an hal a; an thian thate leh an chhungte bakah an thenawmte hnenah chithlum an sem a, hlim takin hun an hmang hlawm.

Hetih mek lai hian ram chhung hmun hrang hrangah boruak bawlhhlawh nasa tih thawmin kût lawmna hi a bawh buai a, a bik takin khawpui ber Delhi-ah a nasa zual a. Hei vang hian sorkarin halpuah leh halmawi hal a khap a, hal erawh an tam hle tho.

Delhi hi chawlhkar liam ta chhung khan boruak bawlhhlawh takin a tuam kartluan a. Zing lam leh tlai thim hlimah phei chuan khu zam chei chuaiin a bawh khat deuh vek zel.

Diwali hi thatnain sual a hneh lawmna a ni a. Mite chuan laltin te tak tê, diyas an tih leh lehkhaa siam lantin an chhi a, hei hi thimna leh lungngaihna hnena êng a thlen entirna a ni.

Pawn lam hmun awl pawh rangoli an tih hmangin nasa takin an chei a, rangoli an tih hi powder rawng lar tak taka thil chei a ni a, hei hi an mikhualte an lo lawmna leh an in leh lo a lo hmuingil zelna atana an tih a ni.

Diwali hun hi kum tin a ni a inthlak thin a, thla (moon) awmna azirin a danglam thin a; mahse, a tlangpuiin October leh November inkarah a ni thin a. Kuminah hian Pathianni a ni.

Kût lawm tur hian mi pawh an inbuatsaih nasa thin a, bazar a lunin kût lawmna tur kaihhnawih - thawmnaw, sakhaw thil leh thil pek an lei nasa a. He hunah hian an chhungte tlawhin bawm te tak te, mithai an tih, Hindi-a chithlum an sawina chu pe turin an kal nasa hle thin bawk.

Mi thenkhat chuan kût pual hian ni eng emaw zat halmawi an hal thin a, hei hian boruak pawh a tibawlhhlawh nasa thin a. Khawvela khawpui boruak bawlhhlawh ber pakhat, Delhi-ah phei chuan thlasik laia an thenawm state, Punjab leh Haryana-a lo neitute lo hal khu a luh nasat bawk avangin a tibawlhhlawh zual hle thin.

State sorkar chuan kuminah hian halpuah leh halmawi zawrh leh hal an khap a; mahse, mi tam takin an zawm chuang lem lo.