Dominican Republic-ah chawlhkar tawp khan ruah tam tak a sur kaihhnawihah mi 21 vel an thi a, mi tam tak baihvaiin an awm mek bawk tih thuneituten an sawi.

An khawpui, Santo Domingo-a kawngpuia leiverh bang chimah mi pakua an thi a, hei hi chhui zui mek a ni bawk.

Ruah sur nasa avang hian hmun him lo deuhva awm mi 13,000 chuang chu hmun him zawkah sawn an ni.

Emergency Operations Center (COE) chuan ruah hian tui a tilian a, in a chim bakah power a awm lo va, lei leh kawngpui tam tak a chhe bawk tih an sawi.

Thi zingah hian naupang pathum an tel bawk.

Dominican President Luis Abinader chuan an ram chanchina ‘ruah a sur tam ber tum’ ni hialin a sawi.

Caribbean rama ruah tam tak surin social media-ah pawh an tilang nasa a, kawtthlera tui luangin lirthei a len lai pawh hmun tur a awm.

Mi 2,500 chuang chhanchhuah an ni a, chenna in 2,600 chuangin an tuar niin COE chuan a sawi.

Pathianni chawhnu thleng khan chenna hmun 45 zet chu biakpawh theih an la ni lo bawk.

Ruah hi tropical depression avanga thleng niin US embassy chuan Thawhtanniah pawh khan a la sur chhunzawm dawn niin a sawi lawk.

Province 32 awm zinga a tam zawkah inralrinna dar sen leh eng khawn a ni.

President Abinader chuan Nilaini thleng zirna in khar tur a nih thu a puang a, ‘sikulte pawhin an tuar vek’ niin a sawi a, ‘naupangte him nan a ngai bawk’ niin a sawi.

X-ah ruah sur nasa lutuk avanga nunna chân an awm chu pawi a ti tak zet tih a sawi.

Thi zinga pali chu US mi an ni a, an thenawm, Haiti ram mi pathum an tel bawk niin AFP news agency chuan a tar lang.