Aizawl December 28, 2022: Kohhran Thianghlim Youth Evangelical Front North Group huaihawt in Civil Hospital Aizawl tan vawiin leh nimin khan Dr. LB Sailo hriatrengna pualin a thlawn in thisen an pe, thisen an pek hi unit 485 a ni. 

Kohhran Thianghlim ten hunpui laia thisen an pe thin chu lawmawh a tih thu sawiin Dr K. Rothangpuia, HOD Blood Bank Civil Hospital Aizawl chuan, "Hun pui vuakvet avanga NGO, School, kohhran leh tlawmngai hrang te thisen pek kan chawlh thup laia Kohhran Thianghlim thalai ten thisen an rawn pe thin hi a hlu in kan lawm em em a  Krismass vuakveta Accident tam lai leh thisen mamawh laia an rawn che thin hi kan lo thlamuanpui tawh thin hle a ni," a ti. 

Blood Bank hotupa chuan, "A ni khatna ah mi 310 in pe in vawiinah mi 175 in an pe leh a kan duh tawk tawh rih zawk a, thisen pe chak tam tak han hnawl rih ngai kha a hrehawm zawk hle ani, Tunlai hian thisen var mamawhna hi a sang em em a, a var leh sen mawhna hi 50/50 a kai chho tawh a.  Thisen var phei hi chu ni 5 chhung bak a thi mai tawh sia tum khat a tam lutuk han lak kan harsatna  thalai hruaituten min hriatthiampui kha kan lawm zawk khawp mai," a ti bawk.

Kumin 2022 ah hian Kohhran Thianghlim dintu Dr.LB Sailo October 10,  2021-a chatuan ram pan ta hriat reng nan thisen pek hi buatsaih leh an ni. Dec ni 27&28 (ni hnih) chhung hian Solomon's Temple, Kidron Valley Chawlhmun-a thisen pek hi Civil Hospital Aizawl Blood Bank ten a hmunah kal chilhin mipa 323 leh hmeichhia 162 niin mi 485 in thisen hi an pe ani.

Kohhran Thianghlim hian Jerusalem khawmpui denchhen in 2010, 2011, 2012, 2013, 2015, 2016 khan an lo pe tawh a, 2011 hian tum hnih an pe nghe nghe a, religious category ah lawmman 1na tum 6 an la tawh a ni. Thisen an pek tawh zawng zawng hi unit 3282 a tling tawh a, 2018 khan tum khatah Unit 780 an pe a, hei hi an pek tam ber tum a ni a, tum khata thisen pek tam ber ber tum niin hriat a ni.