Mexico-a National Guard chuan Sinaloa cartel-a security chief nia an hriat, ‘El Nini’ tia an koh, Néstor Isidro Pérez Salas chuan a sawi.

‘El Nini’ hi Joaquín ‘El Chapo’ Guzmán-a fapate vengtu, bodyguard rawng tak takte kaihruaitu nia hriat a ni.

El Chapo fapate, ‘Chapitos’ (little Chapos) tia an sawite hi an pa lung ina dah a nih hnua a cartel enkawl zuitute an ni.

US chuan a lumanah $ maktduai 3 zet a chhiar lai a ni.

Ruihhlo leh ralthuam tawlh thin avangin an man duh ber zinga mi a ni.

US thuneitute hian Mexico atanga fentanyl lak luh tin tihtawp nan a tawlhtu cartel-te hi a bei nasa hle a ni.

US Drug Enforcement Administration (DEA) chuan El Chapo fapate pathum - Ovidio Guzmán López leh nu hranga a unaute Iván Archivaldo leh Jesús Alfredo Guzmán Salazar te hian fentanyl-trafficking empire lian tak dinin US-ah dose maktaduai telin an tawlh thin niin an hria.

Ovidio Guzmán López, ‘El Ratón’ (The Mouse) tia an sawi bawk hi September khan US-ah thawn luh niin ruihhlo tawlh leh sum tihchingpenah thubuai siamsak a ni.

‘Chapitos’ dang pahnih erawh an la lian hle.

‘El Nini’ hi heng unaute vengtu bik pawl rorum tak vengtute kaihruaitu ber nia ngaih a ni.

US thil chhuitute chuan ‘El Nini’ hi Chapitos kaihhruai zinga mi thah hmang ber niin mi ruk bo, mi sawisak leh an elpui ruihhlo tawlh vetu dangte thahnaa inhmang nasa niin an sawi.

An cartel lenna hmun, Sinaloa state khawpui, Culiacán-ah man a ni.

Sipai leh National Guard tangkawpin beihpui an thlaknaah Colinas de Rivera vengah hual betin an man a ni.

Mexican chanchinbute chuan ‘El Nini’ hi tlanchhiat tumin in chungah a lawn a, an kap zui duh lo.

Man a nih hnuah Mexico City panpui nghal a ni a, Culiacán-ah hian tharum thawhna a thlen zui loh nan venhimna tihkhauh nghal a ni a. A hmaa Ovidio Guzmán López man hmasak khan nasa takin buaina a chhuak zui a, khatiang kha a thlen leh an hlau a ni.

Kum 2019-a Ovidio Guzmán López-a man a nih hnua buaina nasa tak chhuakah pawh khan ‘El Nini’ hi a mawhphurtu ber nia hriat a ni bawk a, kha buaina chhuakah khan lung in chhungah buaina a chhuak a, inkahna a thleng a, kawngpui lian pawh dan vek a ni bawk.

Tharum thawhna hi a nasat em avangin President Andrés Manuel López Obrador-a chuan Guzmán López-a hi chhuah leh mai turin a ti ta ringawt a ni.

Guzmán López-a hi kum 2023 khan man leh niin US-ah thawn nghal a ni.