Zirtawpni zan dar 8-ah R Dengthuama Indoor Stadium, Mualpuiah nikum final-a intawng, Durtlang North leh Thutak Nunpuitu Team-in Tata SK 712 Pro Volleyball League an tan dawn.

2019 final-ah uiawm takin Chhinga Veng Spikers lakah Durtlang North an tlawm a; Covid-19 leng vanga kum hnih chawlh a nih hnuah ropui zawkin an kir leh a, nikum May 27 khan final-ah 25-20, 23-25, 25-21, 25-23 (3-1)-in TNT an hneh a, a vawi khat nan an champion.

Durtlang North-in an player pawimawh, Lalbiakmuana humhim zo lovin tun season-ah hun an hmang a, Pro Division inelna vawi hnih - season hawnna leh MVA Cup-ah an che tha zo lo.

Mahse, Pro Volleyball title humhim turin an inringtawk tih coach Lalchhuangliana’n a sawi a, “Inrintawkna nei theiin kan inbuatsaihna a tha tawk a. Team tichak lehzual turin state pawn atangin player kan la lut thei bawk a, champion leh theih kan inbeisei hle a ni,” a ti.

Karnataka state team captain ni lai, Anup D Costa an la lut a, Ningani khan India team tana World Cup khel tawh feet 6 leh inchi 4-a sang hian Aizawl lutin Durtlang North team a zawm fel nghal.

Ani bakah hian champion team rinrawl captain Fabian Lallunghnema, 2022 Pro Volleyball-a setter tha ber, C Zonunmawia, R Vanlalmawia leh Vanlaltanpuia te an kawl chhunzawm zel a, mipui rin hlawh turin season kal mek hmang tha tawk lo mah se rin ngam an nihzia lantir ngei an tum a ni.

2016 atanga Pro Volleyball vawi nga neih tawhah TNT tel kim vekin final-ah tum hnih an tlawm tawh a. Tun tumah Mizo hlang bawkin chona an hmachhawn leh dawn a, Durtlang North lakah 2022 final-a an tlawmna an chhang let thei a nih chuan a vawi khat nan champion an tumna kawngah nasa takin a pui ngei dawn a ni.

Chutih laiin TNT-in player langsar neih belh lo chungin season liam taa team tichaktu spiker Laldinchhunga leh setter Lalliankima an hmang thei dawn lo.

Tunlaia Mizo player tha bera ngaih, Vanlaltanchhana bakah captain Vanlalchhantluanga Sailo leh hmasawn mek Zosangzuala'n tha lehzuala an khelh a pawimawh ang.

Coach Lalhmangaihsanga’n, “Kuminah tha zawk, nghet zawk leh tlo zawk turin kan inbuatsaih a, Pathian rin chhan chungin champion thei tura khawpa kan khelh theih ngei kan ring a ni,” a ti.

A hmuna inkhel en tur tan Rs 50-in ticket lei a ngai dawn a ni.

FIXTURE

JUNE 2 (ZIRTAWPNI):
08:00 pm : Durtlang North v TNT (mipa)