ZALEN May 10, 2025 : Vawiin khan Pangbalkawn Community Hall-ah Pangbalkawn khua a chhungkaw 47 te hnenah Buhfai bag khat theuh semna hun hman a ni a, he hun hi Kolasib Bialtu MLA, Deputy Speaker Lalfamkima chuan khuallian niin a hmanpui.

Khuallian, Deputy Speaker chuan, "Kuthnathawktute tan sawrkar a ding zel dawn a ni, Hun reilote, kumkhat chuang hlek chhungin ZPM sawrkar chuan sawhthing leh hmuhphiah te a lei a, lei zel a tum bawk a ni. Chutihrual chuan vawilehkhatah sawrkar hmalakna zawng zawng chu a fel duak duak thei lova, amaherawhchu sawrkar hmalakna erawh chak taka kalpui mek zel a ni," a ti.

Lalfamkima chuan Sawrkarin a hnathawh rahte chu a lo thlawn in a ral dawn lova, kuthnathawktute tan sawrkar chuan theihtawpin a bei zel dawn a ni, a ti a. Universal Health Care scheme chungchang pawh sawiin, chak taka kalpui a ni a, mipui te chu he health Care Scheme ah hian in ziak lut vek turin a ngen nghal bawk a ni. Tin, “Ration Card pawh kan dinhmun a zir zelin kan awmna tur sawrkar in a rawn ruahman zel dawn a ni," a ti bawk.