English singer Ed Sheeran chuan a fanu chu pop star ni lo tura a duh thu a sawi chhuak mauh mai. 

Ed Sheeran leh a nupui Cherry te hian nikum August thla khan fanu Lyra Antarctica an nei a, kum khat a tling ve chauh tihna a nih chu. Heti chung hian a pa Ed Sheeran chuan a fanu hmalam hun tur hi a lo thlir lawk nasa viau a ni awm a, Lyra Antarctica hi zaithiam ni ve lo turin a duh tih a sawi. 

Kum 30 mi Ed Sheeran hian ‘Table Manners with Jessie Ware’ podcast-ah, “Keimah ang ni turin ka duh lo a, ka fanu a nih avanga hriat hlawh pawh ni lo se ka duh. Amahin hming a chher tur a ni,” tiin a sawi.  A nupui Cherry hi hockey player a ni a, Ed pawh hian an fanu Lyra hi a nu hnung zuia infiam mi a nih a rin thu a sawi lang bawk. 

Ed hian a fanu pian hnu khan chhungkaw tana hun tam zawk hman a duh avangin music chawlhsante pawh a lo sawi ri tawh a, a nupui fanaute tan pa tha tak nih a tum ruh hle. 

“Thawk khat lai khan ka chawl lailawk a, music ka play tawh lo ang ti hialin ka rilru ka siam hman. Mahse zawi zawiin bul ka tan chho leh a, ka duh ber erawh pa tha tak nih hi a la ni fan,” tiin a sawi bawk.