Congress (MPCC) chuan tunhnai khan chanchin­bumite an kawmnaah chief minister Lalduhoma chu tun hnai Saipuma Hmar Students Association inkhawmpui a hmanpuinaah thu belhchian dawl lo engemaw zat a sawi tih sawiin, thumuhnu kaitho zawng leh Mizote inkara rilru in tihnat sak thei zawnga belhchian dawl lo a sawi chu pawi an tih thu an sawi a. Chief minister hian kan hnung deuha USA a kan zo hnahthlak unaute hmaa a thusawi leh kan hnung lawka Dampa bial by election campaign laia chi leh chi inkara inhuatna thleng thei a sawi te khan sawi zui a hlawh a. Dampa inthlan campaign laia chief minister thusawi thenkhat hi model code of conduct kalh nia hria in thuneitu sang Election Commission of India hnenah thlen a niin ECI pawhin a zilh hau hial a ni. State khat chief minister hetia zilhhau hial a ngai hi a pawi tak zet a, Mizoram chief minister kan neih tawh zinga ECI zilh hau tawk hmasa ber leh awm chhun a ni hial awm e.

India ram hi hnam hrang hrang leh sakhaw hrang hrang chenna hmnun a ni a, hei vang hian India danpui duangtute pawhin an uluk a. Chi leh sakhaw hrang hrang te zalen tak leh in ngeih taka an awm theihna tur danpui an lo siam a ni. Mizoram ngei pawh hnam hrang hrang awmna a ni a, a hnam bil angin thil kalpui dawn ta ila chuan kan hmabak chu buaina a ni. Chi bil intihrang zawnga kan chet loh avangin vawiin hi thleng thei kan ni a, Mizo kan nihnaah hian kan lungawi tlang niin a lang a. Kan tawng tualleng ber Mizo tawng (Duhlian) tawng pawh kan pawm tlang niin a hriat bawk a, hnamdang ten min awt em em a ni. Chuvangin kan inpumkhatna leh unau kan nihna hi kan vawn nun reng a pawimawh hle.

Mihring kan khawsak hona kawngah hian tute pawh thil ti sual thei vek kan ni a, tu pawhin nun hlui sawi chhuah atana mawi lo kan nei vekin a rinawm. Pawl a ni emaw chhungkua a ni emaw kan nun leh thiltih tha lo lai kan zawn dawn chuan sawisel kai lo kan awm lo a, kan thatna lai kan in hmuh sak thin vanga lungrual taka khawsa ho thei kan ni.

Kan rama roreltu leh kan hotu lian ber chu chief minister hi an ni a. An tawngkam leh khawsak dan pawh mipui ten kan chikin an thiltih hrang hrang pawh en bik an ni thin. Chief minister kalta Zoramthanga pawh kha a tawngkam hrang hrang sawi chhuah thin a niin khang a thusawi te kha lalthutthleng atanga hnuk thlatu a ni a tih theih hial awm e. Tuna kan chief minister neih mekah hian mipui ten rinna leh beiseina sang tak kan nei a, chuvanga roreltuah pawh thlang kan ni. Mahse chief minister hian a thusawi hrang hrang hi a ngaihtuah ngun tawk lo em ni aw tih mai turin a thusawi hi a inkalh nasa ta riau mai a, hetiang zel anih chuan mipui in amaha rinna an neih hi a tlahniam mai ang tih a hlauhawm hle. Ram khat roreltu lu ber leh chief minister meuh hi chuan a thusawi hi uluk leh zualin tun ai hian insum thei se a duhawm hle.