Kum tin India hnampa Mahatma Gandhi piancham pualin a piancham chawlhkar hi faina hapta atan hman a ni thin a. Kuminah pawh he hapta hi hman leh a niin fai inzirtirna atan leh faina hnathawh nan hman a ni leh dawn a ni.

Sawrkar laipui hian faina hi a ngai pawimawh a, Prime Minister Narendra Modi kaihhruai chuan Swachh Bharat tih vuahin India ram a lo fai zawk theih nan nasa takin hma a la a. An hmalakna hi chhunzawm zelin tunah hian Swachh Bharat II kalpui mek a ni. Kan hriat angin India ram chu a la changkang tawk lo hle mai a, a bikin central lamah te phei chuan ek in pawh nei lova pawna inthiar an la tam hle a. Mitin ten ek in an neih theihnan sawrkar laipui chuan hma la in pawna inthiar awm lohna hmun 'open defecation free' turin nasa takin hma a la bawk a. Mizoram phei chu ODF state a puan kan ni tawh a, ODF plus ni turin hmalak mek a ni.

Mizote hi faina kawngah hian hma kan sawn nasa hle mai a, chutih rual erawh chuan hmasawnna tur erawh kan la ngah hle. Kan bawlhhlawh ten kan compound a pelh chuan kan duh tawk mai em ni aw tih mai turin bawlhhlawh paih kawngah tan lak kan la ngai hle mai. Mi tam tak chuan lirthei atanga mei bung, kuhva eina mai bakah kan thil eina kawr te paihchhuah kan la ching a. Hemi kawngah hian tanlak kan la ngai hle tih a lantir.

Mizoramah chuan Biate hi khaw faia sawi an ni a, khaw fai intihsiak ah pawh a zawnin tum 5 fai ber nihna an hauh tawh a ni. Khaw fai an nihna hi an chhawr tangkaina ber chu an hriselna hi a ni a tih theih hial awm e. Biate khua hian khaw tam takin an buaipui leh an thih phahna malaria te hi kum engemaw zat an umbo tawh a ni. Biate khaw faina hi a fakawm a, khawvel hmuhah pawh chhuanawm a tling a ni.

Aizawl khawpuiah pawh AMC hmalakna in khawpui fai anih theih nan nasa taka hmalak chhoh zel a ni a, tun dinhmunah chuan thui takin awmzia nei mahse hmasawnna tur erawh a la tam hle. Bawlhhlawh thliar leh paih kawngah pawh hmasawnna tur a la tam hle. Hnam changkang kan tehna pawh hi an fai leh fai lohah a ni a, chutiang zelin khawpui changkang kan tih pawh hi an fai vang a ni zel. Faina hapta kan hman mek hi inzirthar nan hmang thar ila a tha hle mai. Fai hi hriselna leh changkanna a ni a, thil harsa lo tak leh mitin tih theih anih bawk avang hian mitin te faina kawngah a thara tan kan lak a pawimawh hle.