ZALEN April 21, 2025 : Education Minister Dr. Vanlalthlana chuan Mizoram Government School Teacher’s Union (MIGOTSU) ten badge dum bela sawrkarah lungawilohna an lantir chu mak an tih thu a sawi.

Vawiina ZPM chhung inkhawma thu a sawinaah Minister chuan, “Tunah hian Mizoram Government School Teacher’s Union (MIGOTSU) ten bagde dum belin Sawrkarah lungawilohna an lantir mek a, Education department in theih tawp chhuaha an tana hma kan laknate ngaihtuah chuan an lungawizo lo hi mak kan ti hle a ni. Dan awm sa in School upgrade tura a huam loh te pawh an tel theihna turin Dan kan siam belh mek a, an tana hma kan lakna hi ngaichang thiam sela kan duh hle a ni," a ti.

Higher & Technical Minister chuan College lam chungchang pawh sawiin, "Siaha, Lawngtlai leh Kalmanagar College te an indaih lo viau emaw kan tih laiin Aizawl-a kan College te pawh an lo indaih lo hle mai a, MPSC kal tlangin Lecturer 30 direct a lak kan tum mek a ni," a ti.

Sawrkar kal tawh te chungchang sawiin Dr. Mathlana chuan, "Mizoram Polytechnic Lunglei hi kum 2021 ah sawrkarin a khin let loh avangin a khingtuten thiam an chang a, kum 2022-ah court in Rs nuai 98 ram luah man pe turin sawrkar a hriattir leh a, chu pawh khin let lohvin a awm a ni. Kan sawrkar ve leh khan High Court-ah appeal kan tum a, appeal hun a lo pel tawh a. Tunah hian Supreme court ah kan dil leh mek a ni."

"Sawrkar hmasate khan thil tha tamtak an ti chung khan a lera lan mawi ringawt kha an thupui niin a lang a, RUSA hnuaia School an lo sak te pawh kum rei lo te ah thawm that a ngai leh nghal der tawh a ni. Zirna siam tha tur hian theihtawp kan chhuah zel dawn a, Union Home Minister Pu Amit Shah a lo zin tum khan Central Service ah Mizote kan luh tam leh theihna turin Coaching Center tha kan lo dil a, a hlawhtling dawn niin kan hriaa a lawmawm tak zet a ni," a ti.

ZPM dinhmun sawiin, "Kan hmabak ko zia hi eptu Party te tluka hrechiang an awm lo a, an sulhnu kan chhui mek a ni. Tun dinhmunah hian kan ram siamtha tur chuan ZPM Party hi kan tha ber a, theih tawp kan chhuah mek a, a tum pawh hi kan tum hle a ni. ZPM sawrkar hma laknate hi kan sawi vek seng dawn lova, zirna mai bakah kuthnathawktute tan, kan thalaite tan a takin kan che chhuak mek a, hmasawnna thar pawh kan hmuh zel ka beisei a ni,” a ti bawk.