June 23, 2023; Tunhnai a congress zawm chief secretary hlui Lalnunmawia Chuaungo chuan, Anti-Corruption Bureau (ACB) chu Vigilance chan a ni tih sawiin, Chief Minister enkawl a ni a, hotu lian chhui turin harsatna a awm phah thin niin a sawi.

Vawiin a congress party in political session an neihah thusawiin, Lalnunmawia Chuaungo chuan, eirukna nuaibo theihna tura hmanraw tangkai tak chu Lok Ayukta a nih thu leh chu chu congress sawrkar hun laia din a ni a ni tih a sawi.

"Anti-Corruption Bureau (ACB) hi Vigilance chan a ni a. Chief Minister enkawl a ni a. Hotu lian chhui turin harsatna a awm phah thin. Chuvangin, Congress Party in sorkarna kan chang a nih chuan Lok Ayukta-ah ama puala chhui theihna (investigation) nei turin hma kan la dawn," tiin Lalnunmawia Chuaungo chuan, "CBI ruai turin state sorkar phalna lak a ngai a. Lok Ayukta in CBI rawih a dilna vawi 2 state sorkarah a dil tawh a, mahse phalna an la hmu lo. Pu Lalsawta hova sorkarna kan siam chuan chhui kan ngam dawn a, chhui ngai tur erawh kan ni ve dawn lo," a ti bawk.