ZALEN December 21, 2023 : Excise & Narcotics Department chuan December 20, 2023 (Nilaini) tlai dar 3:30 khan Mualkawi dai, Zokhawthar Road, Champhai District-ah Heroin gram 35 (Hawng 3) leh a neitu nia puh – Tapi Ribiya (32) s/o Tapi Tapa, Siiro Village, Lower Sabansiri District, Arunachal Pradesh-a khawsa nia inchhal an man.

Hemi ni vek, zan dar 8:30 khan he case kaihhnawihah tho hian heroin gram 157.800 (Hawng 13) leh a neitu nia puh - Jayanta Barman (28) s/o Nukaru Barman, Barasakdal, Rakhalmari, West Bengal leh Mansiangsanga (18) s/o Pausawmkhupa, Dinthar veng, Champhai nia inchhalte chu man an ni a, Heroin an phurhna lirthei, Maruti Swift Tourist Taxi, Regn No - AS01KC-3765 pawh hren tel nghal a ni. December 20, 2023-a heroin man hi gram 192.800 (Hawng 16) a ni. Heroin te hi state pawna hralh tur an ni.

Excise & Narcotics Department hian 2023 Krismas & 2024 Kumthar vuatveta Mizoram puma Special Drive an neih mekah zin veivakte himna turin lirthei khalhtute endik hna an thawk mek a. Zu leh ruihhlo dap beihpui an thlak mek a. December 20, 2023 khan Rangvamual leh Phunchawng kawngkama addict 11 te chu Camping Centre / Rehabilitation Centre-ah dahluh an ni bawk.