ZALEN May 16, 2025 : Vawiin khan Excise & Narcotics Department Commissionerate building Conference Hall-ah Excise and Narcotics Department-a officer thenkhat leh Central YMA hnuaia Ruihhlo dotu – Central Anti-Drugs Squad (CADS) hotute leh member ten tunlaia ruihhlo leh a kaihhnawih dap chhuahna leh hetiangin a kaihhnawiha dan palzut lo a thawhhona tha zawk an neih theih dan tur an sawi ho.

He inkawmhona hi Ngurthanzama, Dy Commissioner of Excise & Narotics Department in a kaihruaia a, Excise & Narcotics Department leh CYMA hnuaia CADS te’n thawhhona tha tak hnuaia kan ram himna tura an thawhhona ah lawmawm a tih thu a sawi a. CADS member te chu an department tha tichak tu pawimawh tak an nih thu a sawi bawk.

Peter Zohmingthanga, Joint Commissioner of Excise & Narcotics Department chuan kalkhawm te hi mi man leh bungraw rinhlelh dapna kawnga dan zawm ngai hrang hrang te zirtirna hun a hmang a. Dan bawhchhia te’n thiamloh an channa tur chuan dan zawm a pawimawh thu kalkhawm te a chah.

Roneihthanga, Treasurer CYMA leh CADS Convener ni bawk chuan khawtlang himna atana sawrkar lama an thawhpui Excise & Narcotics Department te’n a hetiang hun an buatsaih chu lawmawm a tih thu leh an thawhhona thatzia ti lang tu a nih thu a sawi a. CADS member te hian mahni in lum pawh thlahlel hlei thei lo a, hlawh nei miah lo a ram himna atana rim taka ruihhlo dona kawnga hma an lak thin thu a tarlang bawk. Roneihthanga chuan vawiina inkawmhona hian rah tha zawk a chhuah ngei a beisei thu leh chumi kawnga ke pen zel tur chuan kalkhawm te a chah bawk.

Kalkhawm te hian ruihhlo ina ram leh thalai te a tihchhiat nasa thu leh chumi ven nana theihtawp chhuaha thawhho zel an tum thu an sawi a. Hemi kawngah hian ram mipui leh tlawmngai pawl dang te puihna an ngen bawk a ni. He inkawmhona ah hian Exise & Narcotics officer 18 bakah CADS member mi 20 chuang an tel thei a ni.