Aizawl January 28, 2024: Lengpui Airport enkawltu dang hnena hlan chungchang ngaihtuah tur leh Mizoram tana tha ber tur zawnga enkawltu tur thlan a nih theih nan a lo bawhzui tur, ‘working group’ din mek a la nih avangin hemi chungchangah hian hmalakna lian tham a la awm rih lo.

ZALEN thudawn danin working group-a tel turte hi thlan mek an ni a, ruat an nihna file pawh a kal mek a. Hei vang hian Lengpui Airport enkawltu dang hnena hlan chungchangah hian ngaihtuahna thui tak hman a la ni lo.

January 10, 2024-a Chief Minister Lalduhoma hova sawrkar mi pawimawh thukhawm chuan Mizoram tana tha ber tur zawnga enkawltu tur thlan a nih theih nana lo bawhzuitu tur, working group din ni se an ti.

Meeting-ah hian India ram hmun danga airport eng emaw zat, Airport Authority of India (AAI) kuta awm mekte an enkawl zui dante leh private company-ten (PPP Mode-a) an kuta awm an enkawl dan chanchin tlangpui tar lan a ni.

Chungte ngaihtuah chung chuan AAI hnenah nge private company hnena hlan tha zawk dawna Mizoram tana hlawk ber tur eng nge ni ang tih kil hrang hranga khaikhinna chipchiar lo neitu tur working committee (working group) din ni se, annin a rang lama lo um zuiin, report kimchang an neih hunah thutkhawm leh ni se, an ti a ni.