Manipur-a buaina chhuak avanga parliament rorel inkhawm a kal mumal theih loh mek laiin kartawpah hian eptu tangrual, INDIA MP eng emaw zat chuan hmarchhak state hi an tlawh dawn.

Party 26 chuang inzawm khawma MP 20 chuang chuan a hmun ngeiah Inrinni leh Pathianni hian Manipur hi an tlawh dawn tih Lok Sabha-a Congress whip Manickam Tagore chuan Ningani khan news agency PTI a hrilh.

Eptu tangruala party tin aiawh pakhat theuh an tel dawn niin sawi a ni a. MP-te hian tlangram leh phaizawl bakah relief camp thenkhat pawh an tlawh dawn.

Eptu MP-ten an tlawh hma thla khat vel liam ta, June 29 leh 30 khan Congress hruaitu, Rahul Gandhi-a’n a lo tlawh tawh a. A ni khatnaah hian Imphal atanga km 20 vela hla, Bishnupur-ah venhimna thil avangin lo dan a ni a. Buaina chhuah nasatna hmun zinga mi, Churachandpur erawh a tlawh.

Congress hruaitu hi Imphal-ah let lehin helicopter-in Churachandpur hi a pan a ni.

Thuneitute chuan Gandhi-a hi hmeichhe pawlin lungawi lohna nasa taka an lantir avangin kaltlangtir a rem lo niin an sawi a. Congress erawh chuan hmeichhiate hi Gandhi-a an lo dan avangin police laka lungawi lo an ni zawk niin an sawi a, kirtir leh chu an duh lo niin an sawi a. Hmeichhiate hian Churachandpur bakah an khuate tlawh turina n duh niin an sawi.

A ni hnihnaa a thil hmuhte tar langin Congress hruaitu chuan, “Manipur-a tharum thawhna thleng avanga an duh tak leh in leh lo chânte tawrhna chu hmuh leh ngaihthlak a hrehawm tak zet a. Ka hmuh apiangte hmelah puih an ngai tak zet tih a lang,” a ti.

Indian National Developmental Inclusive Alliance (INDIA)-a tel ve pakhat, Trinamool Congress chief, West Bengal Chief Minister Mamata Banerjee-i chuan sorkar laipui chu beiin engvanga Bengal-a central team tir lut zut sia Manipur-a tir ve duh miah lo nge an nih tih a zawt.

“Manipur tan kan ding tih lantir kan duh a. BJP hian panchayat inthlan zawhah Bengal-ah hian central team a tir zut a, engvangin nge hmarchhak state-ah hian a tirh ve miah loh,” a ti.

July 20 atanga parliament in hniha fur thutkhawm tan a nih atang khan Rule 267 hnuaiah Manipur-a thil thleng hi eptuten sawiho an phut nasa a, hei vang hian rorel pawh a mumal thei lo.

Eptute hian prime minister-in parliament-ah buaina chungchang a sawi chhuah ngei an phut a, sorkar erawh chuan duh lovin Home Minister Amit Shah-a zawk sawi turin an ti.

Congress chuan Manipur chungchang hi sawi chhuaha a awm theih nan sorkar rintawk lohna an pu lut hial a, Lok Sabha speaker pawhin Nilaini khan a pawmsak tawh a. No confidence miotion hi Telangana-a rorel lai, Bharat Rashtra Samithi-in an pu lut bawk.

May 3-a tlangrama chengten Meitei-ten Scheduled Tribe status neih an duh duh lohna lantir nana ‘Tribal Solidarity March’ an huaihawt atanga buaina chhuakah hian mi 140 chuang an thi tawh a. Mi 3,000 chuangin hliam an tuar tawh bawk a. Mi 50,000 chuan baihvaiin an awm mek bawk.