DOWNLOAD OUR APP

Read latest news on your phone
app-store

Europe-a hri leng tuar na ram, Italy Inkharkhip thar leh

Apr 02, 2021

World Health Organization (WHO) chuan Europe-a invenna damdawi pek muang lutuk chu pawm mai harsa a nih th a sawi a. Tunah hian he khawmualpui hi thla tam liam taa an dinhmun aiin a derthawng zawk niin a sawi. Invenna pek chhuah a chak loh hle lai hian European Union ram tam zawk chuan inkharkhip an puang lo hlawm a, inkhuahkhirhna kalpui mumal pawh an awm vak lo. WHO-in a chhinchhiah dan chuan mihring cheng maktaduai 900 dawna 10% emaw chauhvin vaccine hi an la dawng. France-ah chuan kar tir lamah khan intensive care-ah mi 5,000 chuang an awm leh tawh a, inkharkhip thawh thumna, chawlhkar thum awh tur kalpui tan an tum. Sikulte pawh chawl lehin in lam atanga zirna an kalpui thar leh a, ni tin mamawh zuar ni lo dawrte an khar leh a. Mahni in atanga km 10 huam chhung bak pawn lama tei chhuah khap a ni.

Italy chu Isua Thawhlehna Nia mipui chawlh hmang kal darhten Covid-19 an theh darh leh chiam tur ven nan ni thum chhung inkharkhip an kalpui thar leh.

An ram bial tin chu inkhuahkhirhna chhawng sang ber, ‘red zone’ an tihah dah leh vek tawh an ni a. Tun hnaiah ni khatah mi 20,000 chuang hri kai hmuh chhuah leh thin an ni a, a thawh thumnain a nuai leh mek.

Ni tin mamawh buaipuitu ni lote chu chet chhuah phal a ni lo va, Isua Thawhlehna Ni bikah erawh chhungkaw khatin mi dang pahnih chaw an kilpui thei ang.

Biak inte pawh hawn a ni a; mahse, mahni huam chhung ni lovah tumah inkhawm phal a ni lo thung.

Pope Francis pawhin St Peter’s Square-a Thawhlehna Ni thuchah chu mipui awm lovin a sawi dawn a, nikum pawh khan hetiang hian a sawi tawh.

Kartawp chawlh a liam hnuah ram bial tin chu inkhuahkhirhna hniam hret, ‘orange zone’-ah emaw, an dinhmun azirin ‘red zone’-ah emaw, tun thla tawp thleng an awm zui ang.

Italy hi Europe ram dang ang bawkin invenna damdawi pek a muan avangin tunah hri leng tharin a tibuai leh mek a, ram dangte angin thunun tumin hma an la mek.

Italy hi hripui tuar na ber zinga mi niin mi 1,10,328 zetin an thihpui tawh a, mi maktaduai 3.6 velin an kai tawh bawk.

Italy-ah hian nikum tun ang hun velah hian coronavirus an tuarnain khawthlang lama a tuar na hmasa an ni a. February, 2020 khan an ram hmar lam tam tak chu ina awm tura intiin a hnu lawkah ram pum an inkharkhip zui.

June thla atangin an inthlahdul a; mahse, Covid-19 thawh thumnain a nuai leh tan mek a. April khan mi 23,634 zet kai hmuh chhuah thar awmin mi 501-in an thihpui leh.

Inkharkhip an kalpui thar lehah hian ni tin mamawh zuar ni lo dawrte an khar a, cafe leh thingpui dawrte pawh pawn lama pek chhuah chiah phal a ni.

Red zone an tih huam chinah hian tul bik thil tih lovah chuan zin veivah pawh khap a ni thin a; mahse, Thawhlehna Ni bikah hian ram bial pakhat huama chhungkua leh thiante intlawh erawh phal a ni dawn.

Italian sorkar hian inkharkhip kengkawh tur hian police officer 70,000 zet a rawih belh.

Share now