Facebook CEO Mark Zuckerberg chuan October 28, 2-21 (Ningani) khan facebook company hming an thlak thu leh a hming thar chu 'Meta' a nih thu a puang. Hetih rual hian facebook chu a la awm reng tur thu sawiin, Meta chu an company application hrang hrang hmun khata khaikhawmtu leh an technology company brand thar pakhat a nih thu a sawi. 

Eng nge Meta chu? 

Metaverse a ni a, a lawm tawiin 'Meta' tiin an sawi. Meta hi Greek tawng atanga lak niin, a awmzia chu 'piah lam' (beyond) tihna a ni. Meta-ah hi chuan Virtual Reality (VR) hmangin engkim awlsam takin a tih theih tawh dawn a, game a khelho theih tawh ang a, hna thawkho bakah inkawmhote pawh awlsam takin a theih vek dawn a ni. 

Computer kher hman a ngai tawh dawn lo a, headset hmangin a luh zung zung theih tawh dawn - virtual world hi internet khawvela kan hmabak chu a ni ta. 

Mr Zuckerberg chuan Metaverse chu mipuite - a huhoa an inkawm khawmna, hna thawhhona leh a huhoa thil an siamna hmun a la nih tur thu sawiin, tun atanga kum 10-ah chuan khawvel mihring tluklehdingawn khat vel zet hnen a thlen tawh an beisei tih a sawi. Chutih rual chuan tun hnai maiah chuan sum hmuh nan an hman theih a beisei lo tih a tarlang bawk. 

Zuckerberg chuan, "Tunah chuan sum hmuhna turin kan ruahman lo a, mahse nakin lawkah chuan Metaverse hi mobile internet thlaktu tur a la nih ngei kan beisei," a ti. 
Facebook hian tun hnai khan Connect 2021 an buatsaih a, he hunah hian Meta hi tlangzarh a ni. Meta hian Facebook, Instagram leh Whatsapp te a thlak dawn tihna lam a ni lo a, nakin atana an platform thar tura an lo duan lawk mai a ni. 

Company lam chuan Metaverse-a thawk tur hian hnathawktu 10,000 vel an rawih belh dawn niin an tarlanga, Menlo Park, California-a an headquarters-ah pawh Meta logo hi an tar vang tawh a ni. 

Messenger, Instagram leh WhatsApp te hi Facebook hnuaia awm vek niin, Mark Zuckerberg leh a company te hian internet khawvel tharah min hruai lut leh dawn a nih hmel hle. 

Nep nawi

Meta hi Hebrai tawng chuan thi 'dead' tihna a ni a, hei vang hian dodalna a awm nghal a, #FacebookDead hashtag pawh a lar leh tawh viau. He hashtag hi Twitter lamah chuan hmuh tur a tam hle a, mi tam takin an sawisel a, a hming hi thlak leh tur ten an ngen a ni. 

Hetih lai hian company hming hi a pawimawh ber lo a, dodalna karah pawh company tam tak an lo ding chhuak tawh. China-a KFC a luh tirh khan an slogan 'finger lickin' good' tih chu Chinese tawngah chuan a lo duhawm vak lo hle mai a, chuti chung chuan China-ah hian KFC hi an thangduang hle a ni.