ZALEN April 29, 2025 : MNF Action & Vigilance Committee chuan vawiin khan Champhai Press Club-ah thuthar thehdarhtute an kawm he hunah hian MNF General Secretary David R. Lalsawmtluanga, Secretary, Action & Vigilance chuan Food Civil Supplies & Consumers Affairs Department kaltlangin ZPM kaihhruai sawrkar hian nasa takin mipui a rawk tiin hriatthiam harsa an ti a, an thiltihte ennawna siam tha turin an phut thu a sawi.

David R. Lalsawmtluanga chuan, "Mizoram sawrkar inrelbawlna hi mumal taka duan sa a ni a. Sum thawkchhuak tura siam te, mipui rawngbawl tura siam leh mipui venghimtu tura siam leh a dangte a awm a, sum hmuhlet beisei miah loa mipui rawngbawlna tur liau liau Education Dept te, Health & Family Dept te, Social Welfare leh Food Civil Supply & Consumers Affairs Dept leh a dangte a awm a. Heng zinga pawimawh ber, chhungtin leh mitin rawngbawl tura siam Food Civil Supplies & Consumers Affairs Department kaltlanga tun sawrkar, ZPM kaihhruai hian nasa takin mipui a rawk hi hriatthiam harsa kan ti a, an thiltihte ennawna siam tha turin kan phut a ni," an ti.

MNF Action & Vigilance Committee Secretary chuan, "August 2024 atang khan Mizo mipuite tawrhna lian ber nia ngaih turin chhungtin khawih buhfai man uchuak takin an ti to a, sawrkar kal tawh aia ZPM kaihhruai sawrkarin ration buhfai atang ringawta Mizo mipui chhungtinten an buhfai khul to-na tur ringawt hi kum khat chhungin cheng Vaibelchhetak 6, nuaih zathum chuang ni tura chhut a ni. Hetiang taka Mizo mipui chhungtin tawrhna thlen tirna ang thutlukna hi sawrkar kal tawhte khan an la siam ngai lo," a ti.

"RTI Act hmanga information kan hmuh danin March 2025 thleng khan Mizoramah ration card hi 290868 a awm mek a. Ration card khulna tur hi Rs. 20/- ni tura bituk a nih laiin khaw hrang hrangah an duh ang zat zata min khul tir hi pawi kan ti hle a. Champhai District bika information kan dawn danin ration card khulna hi a let aia to Rs.50 te, Rs.30 leh a aia to-a khul tir kan ni a, sawrkar rate bituk aia a leta tama ration card min khultir hi eirukna lian tak a ni a, chhun en laia inrawkna leh eiruk an tih ang, khaw eng zahna nei miah loa rawk kan tawk hi hriatthiam har kan ti hle," tiin.

"Hetianga rate bituk aia to a ration card min khul tir tawh zawng zawng hi min pe let leh vek turin sawrkar kan phut a, thla khat chhunga min pe let lo a nih chuan MNF chuan mipui thlavang hauh hian hma kan la dawn tih kan puang nghal a ni," a ti bawk.

David R. Lalsawmtluanga chuan, "Tunah hian buk tling lo takin ration buhfai hi Mizo mipuiten kan khul mek a, min tiam ang ngeiin Buhfai buk dik tak min pe turin kan phut a ni."

"ZPM hian tha bik tur leh dik bik tura min tiam avanga Mizo mipuiin thlang tling kan ni a, an sawi loh ang leh mipui tawrhna tur ang zela an kal ta hi MNF chuan pawi kan ti a, hetiang bum hmang, sum ngaina tak, thil tha tak tak sawia chhe tak taka rorel ching an nihna hi sim vat tur leh mipui min tiam ang ngeia tha taka rorel turin kan phut a ni," a ti bawk.