Sawrkar laipui, Ministry of Housing & Urban Affairs hnuaiah India ram khawpui hrang hrangte chu chei a ni a, hei hi smart city tia vuah niin cheng vaibelchhe 500 hmanga khawpui chu chei tur a ni.

Aizawl khawpui pawh kum 2017 atang khan smart city hnuaiah hian hmalak tan a ni a, kum nga chhung hnathawh tur a niin kumin June-a tawp tur chu kum khat dang atan pawhsei leh a ni.

Aizawl Smart City hnuaiah hian project 41 kalpui tur a niin heng zinga project 33 hi kalpui mek a ni a, la thawh leh tur project pariat a awm bawk.

Project thawh zawh tawh hi paruk a awm a, chungte chu Pelican Crossing siam, Traffic Bollards Flexible Fixed, Sanitary Napkin Vending Machine and Incinerator, tui in tur thianghlim, zin mite kaihhruaina hmun din (Tourist Guidance Centre Kiosks) leh Reverse Vending Machine dah te an ni.

Aizawl Smart City project hnuaiah hian Integrated Command & Control Centre (ICCC) chu Secretariat old building, Tresury Square-ah bun niin hei hi ‘Go live’ tih hming puttir a ni a, naktuk hian Deputy Chief Minister Tawnluia chuan a hawng dawn a. ICCC hian Aizawl khawpui a vil dawn a ni.

ICCC hnuaiah hian Aizawl khawpui hmun eng emaw zatah closed circuit television tha chi dah a ni a, hei hian chhun leh zanah pawh fiah takin thla a la thei a. Dan leh thupek kengkawhtuten an hmang tangkai hle tura beisei a ni a. Lirthei chetsualna leh bo zawn kawngah Traffic Police-in an chhawr tangkai dawn bakah dan leh thupek kenkawh kawngah te, rukru leh mi sual chhuina kawngahte police-in an tangkaipui hle dawn a ni.

Hengte vil tur hian camera ringawt pawh 296 dah a ni a, sik leh sa lo teh tur leh thil hrang hrang atan khawl chi hrang hrang hmun hrang hrangah dah a ni bawk. Hei bakah hian Aizawl khawpui hmun pali Falkland veng, Vaivakawn, Millennium Centre leh MINECO-ah te TV lian ang chi dah a ni a, hetah hian mipuite hriat tur pawimawhte tar chhuah thin a ni ang.

ICCC hnuaiah vek hian Aizawl khawpuia bawlhhlawh paih motor te chetvelna chiang taka hmuh theih a ni bawk a. Bawlhhlawh paih motor ah global positioning system (GPS) vuah vek a niin a hmun lova bawlhhlawh paih an awm leh awm loh bakah an chetvelna zawng zawng hmuh theih a ni dawn a ni.

Hei bakah hian Aizawl luhka hmun pali, Trinity hospital, Zemabawk, Durtlang leh Huntharah te lirthei chhuak leh lut lo vil bik tur camera dah a ni bawk.