Kan thlaichin zinga langsar tak pakhat chu serthlum hi a ni awm e. Tunhma deuh chuan khawthlang lamin an thar tam a, tunah erawh chuan khawchhak lamah an uar ta zawk thung. Mizoram serthlum hi a tui em avangin hnamdang pawhin an duh hle.

Horticulture department thawktu te chuan Mizoram chu hmarchhak bialah serthlum chin tam lama 2-na a ni tih Zalen an hrilh a, kum 2017 khan serthlum metric ton 44,000 tharin kum 2018 ah metric ton 55,000 thar a ni a, kumin 2019 thar zat chu survey an la neih loh vangin an la hre lo tih an sawi.

Mizoram serthlum chu 'Khasi Mandarin' an tih zinga mi a ni tih sawiin a thlum that avangin hnamdang pawhin an duhin an ngaisang hle tih an sawi a. Mizoram hmun hrang hrangah serthlum chu chin ni mahse khawchhak lam North Vanlaiphai, Leng, Sialhawk, East Lungdar lamah te an thar tha tih Zalen an hrilh.

Kum 1990 hmalam kha chuan khawthlang lamah an thar tha a, mahse an thar that tawh loh avangin khawthlang lama serthlum huan neitu te chuan an huan chu kuhva leh rubber chinnan an hmang ta zawk niin an sawi bawk.

Zalen zawhna chhangin East Lungdar khawtlang hruaitu te chuan kum dang aiin kum inah serthlum thar an tlem zawk niin an sawi a, nikum an phak dawn lo tih sawiin serthlum chu a kum chhawkin a thar tam nia an hriat thu an sawi bawk. E.Lungdar VC te chuan serthlum nei tam deuh ho chu hnamdangin an khar sak thin tih sawiin vai ho hian a sen lai atangin an leisak tih an sawi a. A nei tlem leh thar thalo deuh te chuan Aizawl leh khawpui dang ah te an hralh thin niin an sawi bawk.

Aizawl khawpuia serthlum zuar te hian a tlangpuiin khawchhak lam atangin serthlum hi an la ber a. A hmuna kal chilha han lei an awm rualin huan neitu te rawn phurh thlak lo changa lo kharchhawng pawh an awm bawk. Serthlum zuar te hian motor (pick up) hmanga an zawrh bakah kawng sirah inphoa inzuar mi engemaw zat an awm bawk a ni.

Serthlum hian ram tha a duh avangin Mizoram leilung hi a ngeih hle niin mithiam te chuan an sawi a, hmundang ai chuan a thlum pawh a tha zawk niin an sawi. "Phai lam atanga serthlum lokal, mam nalh leh itawm tak tak te hi han ei ila a thawp sut bakah a thlum lo em em mai a. Mizoram serthlum tluk tur hi an awm lo a ni," tiin pa pakhat chuan a sawi a ni. Mizoram leilung chu scientific taka sawngbawl anih chuan tun aia hlawk zawk hian serthlum hi a thar theih a, thlai dang aiin a hlawk zawk niin mithiam te’n an sawi.