Mizo Kristiante hunpui ber chu Krismas hi a ni awm e. Krismas a lo thlen dawn chuan chhung tinin thawmhnaw thar neih kan duh a, kan neih phak ang tawk tawkin thawmhnaw thar kan lei thin. Thingtlang zawk a cheng te pawhin khawpui kalna remchang ni pah fawmin leh thil man tlawm zawkna ni bawk Aizawlah an bazar nasa thei hle a. Mahse kum kalta ang erawh chuan Krismas bazar a lun lutuk lo.

ZALEN-in Aizawl New market enkawltute hnen atanga thu a dawn danin sumdawng mi 100 chuang an insawn chhuah avangin kum dang ang chuan bazar a lun lo tih an sawi a. Hetih lai hian new market-a thawmhnaw zuarte chuan kum dang aiin an hralh tha tlangpui nia an hriat thu an sawi a. Krismas bazar ah hian thil bo report a awm lo a, pick pocket pawh report a awm lo niin New market enkawltute chuan Zalen an hrilh bawk.

ZALEN-in Aizawla service thin khaw hrang hrang maxi cab service te a biakna ah zin veivak an tlem hle niin an sawi a. “Kum dangah chuan Krismas dawn hnai hi passenger kan neih tam hun a ni a. Aizawl atangin zirlai leh hnathawk mi eng emaw zat kan phur haw a, chutiang bawkin kan khaw lam atangin Mas bazar tur mi engemaw zat kan phur thin bawk a.  Mahse nikum chu passenger an tlem a, Sumo lam pawh kan tlan tlem hle a ni,” an ti a. Zin veivak an tlem chhan chu Covid-19 hlauh vang leh sum harsat vang ni bera an hriat thu an sawi.

Aizawl khawpuia Taxi khalh thin pakhat pawhin thingtlang lam atanga bazar an tlem thu leh Aizawl mipui pawh an chhuak tam lo nia a hriat thu sawiin, “Kan tlan tamna hun ber tura kan ngaihah veivak an tlem a. Thingtlang lam atanga bazar tura Aizawl lokal kum dang aiin an tam loh bakah Aizawl mipui hrim hrim pawh hi an pawn chhuak tlem niin ka hria a. Mahse Mas hnaih dawn kha chuan tlemin kan ziaawm ve hret a ni,” a ti ve bawk. Aizawl Traffic duty pakhat pawhin kum dang ang chuan traffic jam nasa lutuk a awm lem lo niin a sawi bawk.