Kristiante hunpui pawimawh ber tih hial ngam Krismas chu kan hma lawkah kan thleng leh dawn ta reng mai a. Mas lo thleng tur kan hmuah tum dan leh kan inbuatsaihna pawh a dang thei hle mai. Thenkhatin nawmchenna lama hun hman an tum laiin thenkhat erawh chuan midang tana malsawmna thlen tir hunah hman an tum a. Chutiang zelin sumdawng te pawhin an bungrua a tam thei ang ber hralh an tum bawk.

Engpawhnise hunpui anih ang ngeiin mahni zawn zawnah nasa takin kan urlawk theuh zawng a nih hi! Krismas hi misual te tlanna atana Isua Krista lo pianna hun anih ang ngeiin mi tam tak chuan luanchhuahna hunah an hmang thin a. Aizawl khawpui chhehvela Home hrang hrang te chuan Mas denchhena mi tam takin tanpuina an pek thin avangin an nghakhlel thin hle tih an sawi a.

Mi inphalte avangin thawmhnaw thar mai bakah ei tur tuihnai te an neih phah avangin an lawm hle tih an sawi. Mipui tam berin an pan thin Civil Hospital, Aizawl thawktute chuan kum telin Krismas denchhena tanpuina pe an pung tih Zalen an hrilh a. “Mi thenkhat chu mahni hming leh veng/khua pawh sawi duh lovin tanpuina an pe a. Keimahni kal tlanga damlo harsate hnena tanpuina pe an awm laiin tam tak chu anmahnia pe pawh an awm bawk a. Kum tinin mi inphal hi an pung tual tual niin kan hria a ni,” an ti bawk.

Aizawl veng pakhata YMA hruaitu chuan Krismas dawnah an Branch-in Home leh an veng chhunga damlo leh harsate tanpuina an pe thin tih sawiin a zawng chhang thlak hle niin a sawi a. “Mi dangte tana malsawmna kan ni thei hi ka lawm a. Home ah ei leh in, silh leh fen chhe tak tak nen an awm a, heng mite tana kan luangchhuak thei hi ka lawm a. Kan pekate aiin a petu hi kan lawm zawk a ni,” a ti bawk.

Krismas puala luan chhuahna langsar tak dang leh chu mahni in leh a vel bakah khawlai chei hi a ni awm e. Chhung-kaw tam takin mahni in leh a vel cheiin Krismas tree mai bakah eng chi hrang hrang nen khawlaite chei a ni a, heng te hi a ti-’Mas-tu tak’ niin mi tam tak chuan an ngai a. Kumin pawh hian veng tam tak chuan an veng chhunga kawn leh hmun remchang laite an chei leh mek a, veng chei ena thlalakpui thahnem tak an awm leh ngei a rinawm.