Dan hlui hnuaiah chuan sawrkar hnathawk nu in nau a han nei a, thla thum awrh sawrkarin chawlh a pe thei a. A fa a hrisel lo viau a ni emaw, amah chu la nuamsam loin la chakvak lo viau pawh ni se dan ang chuan thla thum a chawlh tlin tawh chuan a hna a zawm a ngai a. A fa nausen hnute tui chauh la ring chu a kalsan lawp lawp a ngai \hin. March, 2017 khan sawrkar laipui chuan he dan hi ennawnin dan thar a siam ta a. Nu nau neiten an chawlh hahdam nan leh an fa nausen an enkawl theih nan thla ruk chuang hret, kar 26 chhung chawlh (maternity leave) an hmuh theihna tur 'The Maternity Benefit (Amendment) Bill, 2016' chu Rajya Sabha in a pawm hnu thla khatah Lok Sabha chuan a pass ta a ni. Hei hian sawrkar hnathawk chauh ni lovin organised sector zawng zawnga hnathawk te a huam a. Mizoramah pawh hman \an a ni ve tawh a ni. Dr. Zosangpuii, Obstetrician & Gynaecologist chuan he dan thara maternity leave thla ruk chhung pek a ni tur chu Exclusive Breast Feeding tha taka zawm theihna atana duan a nih a rin thu a sawi a, "Exclusive Breast Feeding ah chuan naute in thla ruk chhung chu chaw dang tel lovin hnute tui chauh a ring tur a ni tih a ni a. Hei hi naute taksa a natna laka a himna (immune system) tichaktu tha tak a ni a, naute in a hrisel phah dawn a ni, " a ti a. Exclusive Breast Feeding (EBF) neih chhung hian nu tan indanna hran lak ngai lovin EBF hi indanna tha tak a ni a, hei hi nu tan invenna tha tak a ni tih a sawi bawk. A hma chuan EBF neih hun chhung hi thla thum tih a nih thin thu sawiin Dr. Zosangpuii chuan tunah thla ruk tih vek a nih tawh thu a sawi a. Thla ruk chhung hian nu in a fa enkawlna hun a nei tam theih dawn avanga \ha a tih thu a sawi bawk. "He dan kan siam lai hian nu nau pai te'n hamthatna tam thei ang ber an dawn theih nan kan ngaihtuah a, hei hi hmeichhia te tan ka thilpek a ni," tiin Labour Minister Bandaru Dattatreya chuan Parliament House ah a sawi a. Women & Child Development Minister Maneka Gandhi pawhin thutlukna ropui tak ram in a siam tih sawiin, "He thutlukna hmang hian kan ramin history kan siam a, hun rei tak kan lo buaipui tawh a hlawhtling thei hi ka lawm hle a ni. Hmeichhe tam tak hei hian a pui dawn a, naupang te pawh an hrisel deuh deuh tawh dawn a ni," tiin a sawi bawk. He dan thar hnuaiah hian nu in a fa neih vawihnihna thleng kar 26 chhung chawlh hi a la thei dawn a, a fa vawi thumna chinah chuan a hmaa mi ang thla thum (kar 12) bawk kha a hmang leh dawn a ni. He dan thar chungchanga a ngaihdan sawiin MHIP President, Saipuii chuan dan thar chu a tha a tih thu a sawi a, "A tha a, a that rual rualin kum khat tal ni thei se, kum khat an nih hi chuan an lo lian ve tawh a, nausen tet lutuk laia kalsan hi a tha lo a ni, " a ti a. "Fa neih tlem lam hi an la ti viau nge, fa pahnih chin chauha han tih chu, pathum tal ni thei se duhthusam a ni," tiin a dan chu tha a tih viau laiin a duh khawp lohna te a sawi tel bawk. The Maternity Benefit (Amendment) Bill, 2016 hnuaiah hian fa la (adopt) te tan kar 12 leave siam a ni bawk. He dan thar hian India chu khawvel pumhuap ang pawhin dinhmun tha tak a luah tir nghal a. Ram hrang hrang ten maternity leave an pek dan chu USA in kar 12, Australia in kar 18, Norway in kar 36-46, Denmark in kar 52 leh China in kar 14 te a ni a, ram thenkhat hian chawlh la te hi hlawh an pe lo a, a thenin a chanve an pe a, India chuan an hlawh ngai (full pay) pe chungin chawlh hi an pe dawn a ni.