National Education Policy 2020 chuan India rama zirna kalphungte chu kum 2040-a thlak danglam vek a tum.

Mizoram University thawktute chuan tun hnai khan an hmunpui, Tanhril-ah press mite kawmin NEP2020 chungchang an sawifiah a. Mizoram University Registrar Prof. Lalnundanga chuan NEP chu July 29, 2020 khan union cabinet-in a pawm tih sawiin hei hian kum 34 lo hman tawh, National Policy on Education 1986 chu a thlak dawn tih a sawi.

NEP hmathlir chu mi zawng zawng huap, thleibik nei loa eng dinhmuna ding tan pawh zir theih zirna tha siam leh pho chhuah a ni a. Hei hian zirlai inziah luh tam dan tuna 26% ni mek chu kum 2030-ah chuan 50%-ah tal tihsan a tum tih a sawi.

NEP danglam bikna sawiin tuna hman meka subject inkawp ngai ang chi kha mahni tui zawng chauh subject a thlan theih tawh dawn a. Zirlaiin eng emaw avanga zirna a chawlhsanin a chhunzawm leh dawnah harsatna a awm thin a, NEP-ah chuan hei hi tihbo a ni a. Kum thum graduate zirna chu kum li-ah tihsan niin master zir duh tan kum khat chauh a ngai tawh dawn a, hemi hnu hian Ph.D a zir theih tawh dawn.

NEP hian zirbingna lam a hawng zau dawn a. Sawrkar laipui leh state sawrkar chu zirna lam atan GDP 6% tal nei tura tih an ni bawk.

NEP chungchanga MZU-in mawhphurtu zinga an ruat, Prof. Zaithanzauva chuan MZU chu NEP bawhzui hmasa pawl a ni tiin, “India rama state 12 vel emaw chauhin college-ah NEP an la tan thei a, chung zingah chuan Mizoram pawh a tel ve a. MZU hian department 37 neiin multi displinary stream pawh kan ti thei a, July, 2023 atang khan kan kalpui tan tawh a ni,” a ti bawk.

Higher & Technical Education department hotute chuan NEP hian tun hmaa naupang kum nga chin a huam thin kha kum thumah tihniamin anganwadi/pre school atanga a chung lamte a huam tawh dawn tih an sawi a. College hrang hranga single stream awm thin chu umboa multi displinary stream-ah siam tum a niin he ruahmanna hi kum 2040 ah chuan College ah te tih hlawhtlin vek tur a ni tih an sawi a. Sawrkar laipuiin NEP hamthatna dawng tur chuan state university neih a ngai a tih avangin sawrkarin university a din ngei a ngai dawn niin an sawi bawk.

ZALEN zawhna chhangin MZU thuneitute chuan NEP chu West Bengal leh Karnataka state-ten hman an tum lo tih an sawi a. Mi thenkhatten NEP chu Hindu sakhaw inzirtirna hmanrua ‘Hindutva’ nia an puhna chungchangah engmah hlauh tur a awm an hriat loh thu an sawi bawk.