Hripui vanga kum hnih dawn kan inkhuahkhirh hnuah sawrkarin inkhuahkhirhna la thlahdul lo mah se,  mipui zingah Covid-19 hri hmachhawn dan kan thiam chhoh zel avangin nitin khawsak phung pawh a pangngai chho zel a. Biak in, bazar, sawrkar pisa leh hmun dangah pawh fimkhur taka nun kan thiam chho zel a, ni tin khawsak phung pawh a pangngai chho tawlh tawlh ta.

Mizorama sumdawn inzawmkhawm pawl Mizoram Merchant Association (MIMA) President PC Laldinthara chuan sumdawnna kawngah an ziaawm hret hret tih ZALEN a hrilh a. “Tun hma chu la pha chiah lo mah ila mipui chhuak an tam avangin sumdawngte pawhin kan ziaawm chho hret hret niin kan hria. Hri chungchanga mipui ngaihdan pawh a dang chho hret hret a, an chhuah ngam tial tial avangin kan ziaawm chho zel turah kan ngai a ni,” a ti. Dawr inhawnchhawk chu hri chung-changah a hlauhawm zawk nia an hriat thu sawiin MIMA President chuan, “Dawr hawn niah mipui an inhawrkhawm tuau tuau mai a, hetia ni tin dawr kan hawn hian an duh hun hunah dawr an kal theih avangin hri inkaichhawn kawngah a hlauhawm lo zawkin kan hria a ni,” a ti bawk.

Maxi cab khalhtu pakhat pawhin a ni telin khualzin an pung chho hret hret zel tih a sawi a. “Phai lamah pawh class an tan dawn tawh avangin zirlai kal an tam chho hle a, hei mai bakah Mizoram chhungah pawh khualzin an tam chhoh zel avangin passenger pawh kan ngah sawt hle a ni,” a ti a. Two wheeler taxi khalhtu leh city bus driver pawhin nunphung a pngngai chhoh zel avangin passenger pawh an nei tam ve sawt sawt niin an sawi bawk.

Restaurant neitu pakhat pawhin an thingpui dawra chawl pawh an pung chho ve zel niin a sawi a. “Office inkalchhawk lai leh hripui thawh thumna a len nasat zual lai kha chuan pawn chhuak an tlem a. Keini restaurant pawhin customer kan neih tlem avangin kan hlawk lo hle a, hawn loh aiah kan hawng vel mai mai a ni. Tunah erawh chuan nun a pangngai chho zel a, kan ziaawm chho ve zel turah ka beisei a ni,” tiin ZALEN a hrilh bawk.

Hripui hmachhawn kawngah mipui ten thilthar kan hre zel a, inkharkhip chu a damdawi a ni lo tih an hriat avang leh economic in a tawrh avangin fimkhur tak chunga dan pangngai a nunpui chu an tum ber niin a lang.