Nimin thleng khan Horticulture, Commerce & Industry leh Mizofed ten Lockdown chhunga an kalpui 'Vegetable Supply Chain' kalpui zel a ni a, inkharkhipna hi thlahdul a nih hunah erawh chhunzawm a ni dawn nge dawn loh a hriat theih rih loh a. Mipui ten thlai tlawm zawka an lei theihna tur leh loneitute tana tha tur ngaihtuah-in chhunzawm erawh chakawm an ti hle niin ZALEN chuan thu a dawng.
"Vegetable Supply Chain hi a tira ruahmanna awmsa a ni lo a, kuthnawthawktu te mangang authawmin a hrin chhuah a ni a, hei hi zawngchhang tlak kan ti khawp mai. Kan chhunzawm ang em tih ka sawi thei lo a, mahse, mi tam takin tha min tihpui a, kan farmer ten an lo hlawkpui bawk a, kan hotute thu thu a ni ang, Chief Minister pawhin a theih chin chu kalpui turin hmalak a ngaih thu a sawi," tiin Horticulture Director Dr. Elizabeth Saipari chuan a sawi.
Department pahnih leh corporation pakhatin an kalpui he Vegetable Supply Chain avang hian mipuiin chawhmeh man tlawm tak takin an lei theih phah a, mimala zuar te rate thlenga a thununna chen pawh a awm. Chawhmeh hralh chhuahna tur rate bithliah hi Commerce & Industry lam chan niin, a leina sum hi MIZOFED tum a ni thung a, Nodal department Horticulture hi a chah luttu leh farmer te buaipuitu an ni.
Dr. Saipari hian thlai vanglai taka hetiang zat thlai an nei thei hi lawm-awm a ti a, chutih-rualin an hnathawh te a taka hmuh tur awm chu department lamah pawh phurna nasa tak a pek thu a sawi. Tualto thlai pawh nasa takin an tihlar phah niin a ngai bawk.
Vegetable Supply Chain avang hian hmun hrang hranga kuthna-thawktute dinhmun kawng tam takah an hriat chiah zual phah tih pawh ZALEN an hrilh a, khaw tam tak thlai ngah zawng an hriat piah lamah loneitute atanga chawhmeh zuar tam takin chawhmeh an lei sak dan kalphung pawh an bel phah hle tih a sawi.
Vegetable Supply Chain buaipuitute hian Aizawl district bikah hian chawhmeh manah Cheng maktaduai khat, nuai thum, sing kua za riat sawm an seng tawh a, thlai trip 156 ti thleng tawhin phai lam atangin tomato hi tip 8 an lalut tawh bawk. Nimin thleng khat an sum hman atang hian Cheng 94, 83,747 an hmu let tawh a, stock an la nei nual. Nimin khan Serchhip Silhlum Grower society atangin Zikhlum quital 14.4 an dawng a, anni hian Home parukah an Zikhlum dawn te hi an hlan a ni.