FEATURE : Tuaialhthei leh Economy

Admin - Nov 07, 2021

Cheng 107.88 ni hman kha tunah chuan 95.21-ah a tla thla dawrh a

Tun kar chho mai khan Hindu te hunpui Diwali avangin India ram state hrang hrangah tuialhthei man a tla hniam nasa hle a, state azirin a tlakhniam dan erawh a inang lo sung a, keini state chuan petrol leh diesel manah hian cheng 7-in kan tihniam a, centre lamin Excise duty an la tlem chho ta bawk nen a tlakna hi cheng 12 lai a ni a, Cheng 107.88 ni hman kha tunah chuan 95.21-ah a tla thla dawrh a ni. 

October 28, 2021 atanga November 3, 2021 khan nitin petrol man hi a pung a, November 4, 2021 khan 102.02-ah tla thla in November 5 atanga khan tuna kan rate 95.21/- litre hi an hmang ta rih a ni.

Taxation department lam chuan hetianga petrol man tlahniam thut hian mimal tan chuan a hlawkna chin awm mah se, a ram pum economy ang zawng chuan that phahna a awm lem lo niin an ngai. “Tuialhthei man asang avangin commercial vehicles ten hman man an ti sang a, mahse, a tlakhniam hian chuan man/hman man hi an tihniam meuh tawh lo a, chuvangin thil hi a tlawm phah tak tak chuang lo,” tiin ZALEN an hrilh.

Petrol leh diesel man tla hniam pawh hi a tuar ber tur chu sawrkar a nih thu an sawi a, litre khata cheng 7-a a tlakhniam takah chuan sawrkar sum lut pawh a tlahniam duai lo thei dawn lo, an ti. 

Mizoram taxation department hian petrol manah 25% a la thin a, diesel-ah hian 14.5% lak a ni thung a, hei hi June 1, 2020 atanga hman tan kha a ni. Hemi hma chiah kha chuan petrol-ah hian 20% a la thin a diesel-ah 12% lak a ni thin. Mahse, sawrkain cheng 7-a a tihhniam tak avangin hian tax an lak percent pawh a tlahniam lo thei lo a, A hmaa 25% an chan thinna petrol-ah khan 16.36% chiah an chang ta a, 14.5% an chan thinna diesel-ah phei chuan 5.23% chiah a chang ta a ni.  VAT an lak an revised hma, June 1, 2020 hma lam pawh kha a pha ta lo tihna a ni.

Tuialhthei man tihhniam chungchangah central lamah chuan inhnialna a nasa hle a, opposition lam chuan sawrkar hi beihna atana hmangin politics khelh tumnaah an puh sak a, mipui tana tha tur anga taka a lan rualin ram sawrkar sum lakluh nasa taka tih tlaknaah an ngaih thu ten an vawm let a ni. 

Centre hian Nilaini khan state te hnenah goods and services tax (GST) compensation Cheng Vaibelchhe 17,000 zet a semchhuak a, ti hian Financial Year 2022 atan hian Cheng Vaibelchhe 60,000 zet chu an pechhuak tawh a ni. GST compensation a pek chhuah ni,, petrol leh diesel litre khata Central Excise duty cheng 5-a a tihniam ni, ni bawk tuka state te an VAT lak tihniam ve tura a ngen chu opposition te chuan central sawrkar chu fin kherek chhuahah an puh phah bawk. 

Share now