Vawk natna chi khat, African Swine Fever (ASF) leng chuan ziaawm lam a la pan hlei thei lo va, ni tin vawk thi report a la awm zel a. ASF hi vawk natna chi khat niin he hri veite chu an thi deuh zel a, sawrkarin tihrem/control tumin hma la mah se awmzia a nei thui lo hle.

Chhinchhiah danin ASF vang hian kum 2021 khan vawk 33,417 an thi a, kum 2022-ah 12,795 leh nikum khan Mizoramah vawk an thi a. Vawk natna chi dang, Porcine Reproductive & Respiratory Syndrome (PRRS) vangin kum 2013, 2016 leh 2018 khan Mizoramah vawk eng emaw zat an lo thi tawh bawk a ni.

Aizawl khawpui ringawt pawhin thla khata vawksa a eiral hi kg. 12,45,000 vel niin mi thiamte chuan an chhut a, tun dinhmunah vawksa hi mipui nawlpuiin an ei hreh avangin hralh a kal lo hle a. ASF hri hi a reh hunah chuan vawksa lei tur a vân rin niin harsatna a awm thei dawn niin mi thil chik mite chuan an sawi.

Kumin ASF thawh linaah hian hriat theih chinah vawk 3,140 an thi tawh a, a vei nia hriat vawk 6,019 suat a ni tawh bawk a. ASF hian Mizoram khaw 117 tuam tawhin vawk thi erawh a la ziawm hlei thei lo niin a lang a, engtikah nge hri hi a ziaawm ang tih a la hriat loh a. Mi thenkhat chuan ruahtui a tlak chhoh zel avangin a reh ve mai an beisei.

Vawk natna hri leng avang hian Aizawl khawpuiah chuan vawksa hralh a kal lo hle a, vawk vulhtute pawhin an vawk tihralna an hre lo.

ZALEN zawhna chhangin Aizawl bazar pakhata vawksa sat thin pa pakhat chuan, “ASF vang hian vawk man pawh a tlawm hle a. Ni danga vawk inches 40 vel, Rs. 22,000 vela kan lei thin ang kha tunlai hi chuan Rs. 12,000-ten kan lei thei a. Mahse, vawk man hi tlawm mah se a hralh kawngah kan buai hle a, a chang chuan ni thum laite kan zawrh a ngaih chang a awm thin a. Hun hmasa lama Inrinniah vawk 3/4-te hralh zo thei thin kha tunah chuan mipui lamin ei an hreh deuh tlat avangin a buaithlak khawp mai,” a ti.

Vawk vulhtu pakhat chuan ASF hian harsatna a thlen nasa hle tih sawiin, “ASF laka inven hi a buaithlak khawp mai a, theihtawpa kan fimkhur chung hian vawk vulh zingah pawh ASF hri kai hi an awm leh tlat zel mai a. Sawrkarin hri darh zel tur control-na atana ruahmanna a siam hi a that viau rualin kan vawk a dam that lai hian talh min phalsak mai thin se ka duh hle a. Tun dinhmunah chuan kan vawkten hri an kai hun hi kan nghak ni mai hian a lang a. Vawk compensation sum lah a tlem bawk nen tun ai hian ruahmanna awmze nei zawk hi sawrkar hian siam thei se ka duh hle a ni,” tiin ZALEN a hrilh bawk.

Kumin Mizoram bika ASF hri hmuh hmasakna ber hi February 9, 2024 kha niin Leithum khua, Champhai district-ah a ni.