The Mizoram Liqour Prohibition & Control Act zirchiang tura din study group chuan zu kalzel dan turah rawtna chi thum sawrkarah an thlen a, tun tum chu tlemin sawizau tum ila.The Mizoram Liqour Prohibition & Control Act zirchiang tura din study group chuan zu kalzel dan turah rawtna chi thum sawrkarah an thlen a, tun tum chu tlemin sawizau tum ila. TOTAL PROHIBITION: Zu avanga kan hlawkna leh tawrhna hi 1:2.85 anih miau avangin zu khap bur rawt hi thil awmlo tak niin a lang lo. Re 1 lakluh apiangin Rs 2.85 a kawk tihna a ni a. Total Prohibition kalpui a nih dawn erawh chuan sawrkar, kohhran leh NGO te pawhin nasa zawka beihpui an thlak a tul dawn a. Total Prohibition ah hian dan lova thiltih duhna tam tak a awm dawn bakah dan hnuaia zu hralh chhuah a awm dawn loh avangin sawrkar-in tax atanga revenue hmuh tur a nei dawn lo a, chung sum chu bootlegger ho kutah a lut dawn tihna a nih chu. Revenue kan neih chu excise department in zu chhuanna bel an lilam atanga sum lut leh court fine beitham takte an ni mai dawn a. Zu khap burnaah socio cost benefit zirchianna awm chiahlo mahse benefit (hlep) a awm mang dawn lo tih a lang a, hloh (cost) lam a sang dawn tihna a nih chu. Zu kan in lo vek thei a nih erawh chuan thuhran. CONTROLLED PROHIBITION: Rawtna pahnihna chhiar hian benefit kan neih hmang hian zu in a tihchhiat te chu siamthat nise tihna ni maiin a lang a, zu chhiah vaibelchhe 100 chuang kum tina lo lut chu ‘damage control’ atan hman nise tihna a ni ber. A awmziaah chuan zu in a khawih chhiat ‘cost’ lam chu sawrkarin pawhthlak a tum anga, a hlawkna (benefit) a hmuh chu a tihsan a tum dawn a ni. Tuna zu kan zawrh danah hi chuan hetiang ang ruahmanna hi a awm hauh lo thung. Zu zawrh hi khawi ram mahin an hlawkpui lo a, mahse an zawrh pawhin dan kenkawh lamah an khauh hle thung a ni. Zu that leh that lohna lanna langsar ber a nih avangin helama inzirtirna leh inenkawlna, a ngawl vei mai turte tanpuina leh tal chhuah dan tur inhrilhna lam uar study group chuan an ngai pawimawh hle a. Kum 21 tlin hmaa zu tem miah lote zingah harsatna a tlem bik nia ngaih a nih vangin in thei chin bithliah hi khauh zawka kalpui an duh a ni. Rui chunga motor khalh te, card system ennawn te, khawlaia rui te, hnathawhnaa ruih chingte hi khauh zawka vil ni se tihte, media kaltlanga nasa zawka zu that lohna leh nghawng a neih theihte inzirtirna tih chhuah nise tihte chu rawtna awmze nei tak a ni. Excise department lam an indaih lo hle a,  thuam chak an mamawh a, zu a alcohol awm a zirin aman bithliah leh tualchhung zu zawrh tel pawh rawt a ni a. NDPS Act hnuaia Drug De-addiction programme kalpui nana sum an dah ang deuh hian Zu atanga chhiah hmuhte hi zu avanga harsatna tawkte tanpuina atana hman theih tura ruahman ni ta se tih chu study group duhthusam a ni. FREE SALE: Zu khuahkhirh hi thil har a nih avangin zalen taka zu zawrh rawtna a ni thung a ni.