ZALEN April 22, 2025 : Zo Re-Unification Organisation (ZORO) General Headquarters chuan ZORO office ah Executive Meeting a nei a. Meeting chuan India Sawrkar-in FMR thiat a, India-Myanmar Border Fencing a tum chungchang a rel.

ZORO chuan, "FMR hlip a, Border Fencing siam hian, misual, ruihhlo tawlh thinte, a dan a rinawm loh a, a dan dan tha ber, Fencing a nih hma pawh a ruihhlo kaltlangna ber Check Gate a duty -Assam Rifles, Mizoram Police leh Customs-te ti chak tur leh ruihhlo kaihhnawiha sumdawng-te beihpui thlak tak meuh meuha zawn chhuah hna nasa leh zual zawk a thawk turin India Sawrkar laipui leh Mizoram State sawrkar-te chu a ngen."

"Heng ruihhlo leh dan lova sumdawnna avanga kan dikna chanvo chhuhsak leh kan hnam hma hun thui tak chhe tur te, ram tam tak kan chan tur leh kan eizawnna thlenga nasa taka a ngawng turte ngaihtuahin a tuar turte chu midik, mifel bak an nih a rinawm loh a. Chuvang chuan FMR hi a nihna anga dah let leh a, Border Fencing pawh kaltlang pui lo turin India Sawrkar laipui chu a ngen nawn leh a ni," an ti.

Meeting chuan ZORO hmalakna thawp tlat tura mipuite ngenin, "India Sawrkar laipui-in kan unaute nena zalen taka kan inkalpawh theihna dan (FMR) hlip a, kan inkara ramri hung (Border Fencing) a tum chu kan hnam kal zel tur atana him lo leh kan dikna chanvo rah behna leh chhuhsakna a nih avangin a tawp thlenga a dodal chhunzawm tur thu a sawi nawn leh a. Mipuite pawhin thil nihna tak chhut a, kan hnam hma hun tur thlir chung leh kan hnam, kan ram tana tha ber tur ngaihtuaha thlawp tlat turin kan ngen nawn leh a ni," an ti.

ZORO Meeting chuan, "Free Movement Regime (FMR) thiah leh Border fencing a lo rik tirh khan Zofate chuan kan helh in kan duh lo tlang hle a. ZORO pawhin theih tawpin kan dodal a. NGO hrang hrang leh Political party pawhin dodalin, Mizoram State Legislative Assembly session-ah pawh duh loh na resolution lungrual taka pass a lo ni tawh a ni."

"Kha ti khawpa kan duh loh tlan, hun reilote hnu leka Social media a ngaihdan/duhdan thlak kan awm chu ZORO chuan pawi a ti hle a. Hetianga ngaihdan lo siam tawh te pawhin kan hnam tana a pawi thui dan turte, kan ram nasa taka kan chan dan turte leh, kan eizawnna, kan leilet thlenga kan chan nasat dan turte hre thar chunga ngaihtuahna lo seng nawn leh hram turin mipuite a ngen," an ti bawk.