Indonesia President Joko Widodo chuan November-a G20 Summit an thlen turah China President Xi Jinping leh Russia President Vladimir Putin te chu an tel dawn tih a puang. Hei hian khawvel ram hrang hrangte beng a verh hle a, ram pahnihte hi tunlaia boruak nei lian an nih avangin summit-a an tel tur ringawt pawh hian thawm a nei nghal hat a ni. 

Joko Widodo chuan,"Xi Jinping hi a lo kal dawn a, President Putin pawhin a lo kal tur thu min hrilh," tiin a sawi. Hei hi ram pahnih hruaitute summit-a an tel tur thu puan a nih vawi khatna a ni nghe nghe. Russia hian Ukraine a run mek avangin summit-ah hian a tel mi tam tak chuan an ring lo a, indona an kalpui hnua summit-a a tel vawi khatna tur a ni ang. 

China pawhin Tiwan a rum thaih mek a, US nen tawngkain an invau tawn reng. Hetiang boruak karah hian 
Xi chuan January 2020 hnua a vawi khat nan an ram chhuah sanin ramdangah a zin dawn a ni. Summit-ah hian US President Joe Biden pawh a tel rin a ni a, ram pahnih hruaitute hi a kawm dawn em hriat a la ni lo. 

Washington chuan G20 ramte chu member a nihna atanga Russia paih turin a lo ngen tawh a, Ukraine run a bansan loh chuan sawm lo turin a ngen bawk. He tih lai hian Indonesia President chuan an rama summit neih tur chu remna leh muanna thlentu ni thei se a duh tih a sawi a, Russia leh Ukraine inkar pawh a that phah ngei a rin thu a sawi. G20 Summit hi Bali, Indonesia-ah November hian neih a ni ang.