Congress President Sonia Gandhi chuan Thawhlehni khan state panga - Uttar Pradesh, Uttarakhand, Punjab, Goa leh Manipur-a an party chief theuh chu tun hnaia assembly inthlanna an chak loh hnuah a bân.

Congress thupuangtu, Randeep Surjewala chuan state party chief bân an nih thu hi a puang.

India-a party hlun ber hi tun hnai assembly inthlanah khan an che chhe hle a. Uttar Pradesh, Uttarakhand, Goa leh Manipur-a an chet chhiat piah lamah an rorelna, Punjab an chân bawk a. Khawthlang lam state hi rorelna an la chan hramna pathum an neih zinga mi a ni. 

Inthlana an chak loh hnuah Pathianni khan Congress Working Committee (CWC) chu darkar nga lai thukhawmin Gandhi-i chu a nihna la chelh zui tura nawr a nih rualin an party chuan intihchak thar an mamawh hle tih an sawi.

An hruaitu thenkhatin Gandhi chhungkua chu kiang tawh se an duh niawma ngaih theih tura an sawi laiin CWC chuan a kaihhruaina an la ringtawk tih an sawi ve thung.

“Kan bei zel ang a, kan la kal pel thuai ang. I aw hi kan la zawm zel ang,” an ti.