Indona nasa tak a kal mek zel laiin UN hnuaia tanpuitu pawl hotu chuan Gaza-a cheng zahve zet chu an tam mek niin a sawi.

UN World Food Programme Deputy Director Carl Skau chuan Strip-ah hian mi chengte mamawh tlem chauh a lut thei tih a sawi a, mi 10 zela pakua zelchuan ni nin ei tur an nei lo niin a sawi.

Gaza dinhmun thlirin puihna thil thawn luh chu ‘thil theih loh tluk’ a nih thu Skau hian a sawi bawk.

Israel chuan Hamas chhut chimih nan leh Israeli an mante chhuah an nih theih nan Gaza hi thlawhna hmangin a chhu chhunzawm zel dawn tih a sawi.

Israel Defence Forces thupuangtu, Lt Col Richard Hecht chuan ‘civil mite thihna leh natna hi hrehawm kan ti a; mahse, kawng dang kan zawh dawn chuang lo’ tiin BBC hnenah Inrinni khan a sawi.

“Gaza Strip-ah hian kan tih theih ang apiang kan ti zel dawn a ni,” a ti.

IDF Chief of Staff Herzi Halevi chuan an sipaite hnenah, “Mi fifiakte inpe kan hmu zel a, hei hi an inzawmna a chat tan tih lantirna a ni a; chuvangin, nasa takin nawr zel rawh u,” tia a sawi lai video a darh bawk.

Hetih lai hian Biden-a sorkar chuan emergency law hmangin Congress-ah tank mu 14,000 vel zet, $ maktaduai 106 man zet tur Israel-a hralhna tur a pawm bawk.

October 7-a Hamas fighter-ten Israel nena an inrina venhim khauh tak paltlanga Israel ram lut rua mi 1,200 zet an thah bakah mi 240 vel an man hnuah Israel hian Gaza hi a kap zui a, hemi hnu lamah hian indona nasa tak a chhuak zui mek.

An ram chhunga Hamas chetna chhan let nan hian Israel chuan Gaza nena an inrina kharin thlawhna hmangin a kap zui a, Gazan-te innghahna ber, mi dang tanpuina an dawn thin ang zawng zawng luh a phalsak lo bawk.

Hamas enkawl health ministry chuan Israel hian Gazan 17,700 chuang an that tawh niin an sawi a, heng zingah hian naupang pawh 7,000 chuang an tel.

Egypt atanga luh theihna, Rafah crossing chiah hawn niin hetah pawh hian puihna thil tlem chauh Gaza-ah hian phurh luh theih a ni a. Kar liam taah khan Israel chuan an ram atanga luh theihna, Kerem Shalom crossing chu ni reilo te hnuah a hawng dawn tih a sawi a; mahse, lorry chauh an lut thei dawn a, chungte pawh Rafah-ah kalin Gaza-ah an lut thei chauh dawn a ni.

Thla hmasa khan ram dangte nawrna avangin ni sarih chhung inkahhai an puang a, Gaza Strip-ah puihna tlem a lut thei a; mahse, WFP chuan hmun dang hawn a ngai tak zet tih a sawi.

Skau chuan hmun thenkhatah chuan chhungkaw 10 zela pakua chuan ‘nileng zankhuain ei tur an nei lo’ niin a sawi.

Gaza chhim lam, Israel tank-ten hmun hnih atanga an hual, Khan Younis-ah phei chuan mi chengte dinhmun a chhe hle.

Khan Younis hi tun hnaia thlawhna hmanga kah nasa a ni a, an damdawi in neih chhun, Nasser hospital-a an hotupa ber chuan thi leh hliam an dawn nasat lutuk avangin an tan chet ngaihna a awm lo hial niin a sawi.

Israel chuan Hamas hruaitute hi Khan Younis-ah hian an tawm niin a sawi a, lei hnuaiah an biru a nih theih thu leh an sipai chakna chhu chimit turin in tin, kaw tin an hai a ngaih thu a sawi.

Ni sarih inkahhai an puan kha kar khat liam taah a tawp a. An inkahhai chhungin Hamas mi hren 78 chhuahin Israel-in an lung ina Palestinian an tantir mi 180 an chhuah hman bawk.

Hamas hian Gaza-ah mi 100 chuang an la hreng ngei nia hriat a ni.

Inrinni khan Israeli mi hren zinga mi, kum 25 mi, Sahar Baruch chu a chenna veng leh hel pawl hian thah a nih thu an sawi.

Hemi hma lawk, Zirtawpni khan Hamas sipaite chuan video an tichhuak a, IDF-in mi hrente chhanchhuah tuma beihpui an thlaknaa an hlawhchhamna tihlan a ni nghe nghe.