Goa chuan October 31-ah hian coronavirus laka invenna la thei chin zawng zawngte chu a bikima pek hman vek an tum a, India ramah hetiang hlen chhuak hmasa ber an nih theih ngei an inring tih Chief Minister Pramod Sawant chuan Inrinni khan a sawi. 

Prime Minister Narendra Modi-an India ram state zinga a la thei chin hnena vaccine dose khatna pe kim hmasa ber an nih lawmpuina a thawn hma lawkin video link hmangin damdawi ina thawk leh invenna latute a kawmnaah chief minister hian an thil tum hi a sawi. 

“October 31 hian Goa chu invenna la theite hnena ram chhunga a pe kim hmasa ber a ni dawn a. Dose khatna hi 100% kan pe tawh a, dose hnihna pawh a dawng thei chin 42% hnenah kan pe tawh a ni,” a ti. 

Sawant chuan an state-in vaccine an tihriral chu 6% chauh a nih thu sawiin, hei pawh hi hlawhtlinna ropui tak pakhat a nih thu a sawi. 

Goa-ah hian invenna pek hi Tika Utsav initiative hmangin chak lehzuala kalpui a ni a. Hei hi khua zawng zawngah kalpui a ni a, Prime Minister Modi-a piancham vawi 71-na chu Zirtawpni khan an lawm a, hetah hian ni khata invenna an pek tam ber ni record thar an siam bawk. 

Ni riat chhung awh tur Tika Utsav 3.2 an kalpui mekah hian panchayat member, MLA leh minister zawng zawngin beihpui an thlak a. “Sakhaw hruaitute bakah kawng hrang hranga mi entawnte pawhin invenna pek beihpui thlaknaah hian hma an la \heuh bawk a ni,” tiin Sawant chuan a sawi.