Aizawl : Health Minister, Dr.R.Lalthangliana chuan Good Friday leh Easter Sunday pualin March ni 2, 2021 tlai khan Zoram Medical College (ZMC) a Covid-19 vei enkawl mektute leh Durtlang BSUP Building-a Covid-19 damlo enkawltute tan thei leh thlai chi hrang hrang a pe.

Health Minister hian heng thil pekte hi thawktu dang te a hlan tir a, ZMC-ah hian Ward Superintendent, Catherine Lalremruati leh Staffs Nurse-ten lo dawngsawngin, BSUP Building Durtlangah hian Dr. H. Lalsangliana leh thawktu dangten an lo dawng a ni.

ZMC-ah hian Covid-19 damlo 9 (pakua) enkawl mek an ni a, an zinga pahnih chu an serious deuh a. BSUP Building Durtlangah hian mi 27 enkawl mek an ni a. Heng an enkawlte hi Hospital hrang hrang atanga hrikai an hmuh chhuahte an ni a, serious lutuk erawh an awm lo.

Thilpek petu Dr.R Lalthangliana chuan, "Kristian ten kan hunpui Good Friday leh Easter Sunday chu Pathian zarah dam takin kan lo thleng leh ta a. Hemi ni denchhen hian in thawhrimna leh inpekna te, theih tawpa a thim a var pawh thlu lova khawvelin kan hripui hmachhawn mek Covid-19 donaah kan ram tan thah inthlah loh avangin lawmawm ka ti hle a. Lawmthu sawi nan heng thlai leh thei hrang hrangte hi ka naute kaltlangin ka han present che u a ni. In thawhrimna leh inpekna hlu tak hi sorkar ang pawhin kan hria a, taima leh rinawm taka thawk chhunzawm zel turin ka ngen nghal bawk che u," a ti.