Elon Musk leh Google co-founder Sergey Brin-a nupui te chu a ruka inkawp anga thuthang awm mek chu, SpaceX leh Tesla neitu Elon Musk chuan a pha nasa hle a. Sergey Brin nen chuan thian an nih thu a sawi bawk. 

Sergey Brin-a nen hian thian an nih thu leh a nupui Shanahan nen chuan kum thum chhungin vawi hnih bak an inhmun loh thu a sawi a, an inkarah eng hmangaih biahthu mah a awm loh thu a sawi. 

“An thu tlangthan tir mek hi thu awmze neilo a ni. Sergey leh kei hi thian kan ni a, party naah kan kal tlang a, a nupui Nicole phei chu kum thun chhungin tum hnih chiah ka la hmu a ni a, kan inkarah eng biahthu mah a awm lo ve," tiin Musk chuan an puhna a pha nasa hle a ni.  

Wall Street Journal thung chuan December thla khan Miami-ah Musk leh Shanahan hian hun rei lutuk lo chu hmangaih par an tlan dun niin an lo sawi ve thung. He thu hria hian January thla khan kum 48 mi Brin chuan inthenna lehkha a siam tir rum rum niin an sawi bawk. Hei hian kum 51-a upa Musk-a nena hun rei tak an lo in thian thatna chu a chhu-chat nghal bawk a ni. 

2008 financial crisis lai khan Elon Musk-a electric car a siamna kawngah nasa takin Brin hian a lo pui tawh nghe nghe a, mahse, tunah chuan Musk-a company-a investment a tih zawng zawng pawh hnuk kir vek turin a adviser chu a hrilh thawh a ni. Bloomberg Billionaire tarlan danin tunah Musk hi khawvela mi hausa ber niin $242 billion a nei mek a, Brin hi hausa pariatna niin a sum neih hlut zawng chu $94.6 billion a ni thung.

He buaina hi Musk-a mimal nun duhawm loh an puanzarna hnuhnung ber niin a mualpho phah leh ngei ang le. Tun hma lamin a fa phir te hi Neuralink bul tan nan artificial intelligence hmangin a senior executive laka a fa hrinte niin a lo tlang thang tawh a, kum 2016 khan SpaceX hnuaia thawk chu zahmawh rawngkaia a lo zar buai vangin $250,000 a lo chawi tawh bawk a ni. 

Musk chuan he inpuhna hi dawt phuahchawp mai a nih thu a sawi fan a, Twitter Inc. lei leh lo tura thu tlukna a siam vanga amah dipdal tumna mai nia sawi a awm bawk.