Aizawl November 29, 2023: Governor Dr Hari Babu Kambhampati chuan Indian Armed Forces atanga India rama Woman Aide-De-Camp (ADC) hmasa ber atan Sqn. Leader Manisha Padhi, 2015 batch Indian Air Force Officer chu a ruat.

Governor Dr Hari Babu Kambhampati chuan a ADC pahnih zinga pakhat zawk atan Lady Air Force Officer a ruat chungchangah heti hian a sawi. "He hna pawimawh tak thawk tura hmeichhe officer a tling chu thil chhinchhiah thlak a ni mai lo a. Hmeichhiaten mipa te chauh tih theih anga mipui nawlpui ten a ngaih thin, hmuh theih loh indaidanna bang su chhiain kawng hrang hranga an hlawhtling thei a ni tilangtu a ni," a ti.

Sqn Leader Manisha Padhi hian vawiin chawhma khan Mizoram Governor Office-ah a hna hi a zawm nghal a. He hna a rawn thawh hma hian Sqn Leader Manisha Padhi hi posting pathum - Air Force Station, Bidar, Air Force Station, Pune leh Air Force Station, Bhatinda-ah te a lo thawk tawh a ni.