ZALEN April 2, 2025 : Mizoram Larsap General (Dr) Vijay Kumar Singh, PVSM, AVSM, YSM (Retd) chuan Lawngtlai District a tlawhnaah Free Movement Regime (FMR) kalpui dan chu sawrkar laipui atanga tihbuai tumna a awm loh thu sawiin, inkaihhruaina thar siam chu dan lova thil tih veng tur leh khua leh tuite tana tha tura ruahman zawk a ni a ti.

Larsap General (Dr) Vijay Kumar Singh chuan ramri bulhnaia awmte zalen taka inkalpawhna Free Movement Regime (FMR) chu tunhma atanga lo neih tawh a nih thu leh Sawrkar laipuiin tihbuai a tum loh tiin, tunhnaiah thenawm ram buai avangin khua leh tuite him zawk nan leh dan lova ramri kana thil tih a awm loh nan inkaihhruaina thar siam a ni a, hei hian inkalpawhnaah harsatna siam a tum lova, dan lova thil tih a veng dawn a, khua leh tuite tana tha tura ruahman zawk a ni, a ti.

Larsap chuan ramri kaltlanga ruihhlo tawlhruk a hluar chu veiawm a tih thu sawiin, Mizoram chu ram ralmuang leh nuam a nih zel theih nana tanrual a tul a ti a. Sawrkar laipui scheme pawimawh hrang hrangte tarlangin, mipuite'n an chhawr tangkai theih nana tan lak a tul thu a sawi bawk.