Aizawl May 18, 2023: Governor Dr. Hari Babu Kambhampati, MZU Chief Rector ni bawk chuan Vawiin khan MZU Auditorium-ah Mizoram University (MZU)-a Dept. of Physics leh Mizoram Science Centre, Directorate of Science & Technology, GoM te tangkawpin Mizo ten Arsi chanchin an hriat dan zirna, Two-day International Symposium on the History of Astronomy of the Mizo People' an buatsaih chu khuallian niin a hawng. 

Symposium hawngtu Governor Dr. Hari Babu Kambhampati chuan, "Arsi te chanchin hian mihringte nunah hmun lairil tak an luah a, hmakhawsang atang tawhin khawvel hmun hrang hranga cheng ten an hnam mil ang zelin Arsi te thawnthu an nei tawh thin. Van pakhat hnuaia cheng kan nih angin Arsi chungchanga kan thil hriat zirna leh chhinchhiahna bakah thawnthu te a ngaihnawmin a bengvar thlak thin hle. India ram mi te ngei pawh hian mithiam Aryabhatta hun atang tawhin thuk takin an nun nen inzawmna neiin an lo ngai thin," a ti.

Governor chuan, "Hetiang ang hnam ziarang nen inzawm tlat thil hlui ngaihhlutna hi tlahniam zelin, thangtharte hian vawnthat kawngah hmalak reng a ngai a ni," a ti. Mizo Pi leh Puten arsi an lo hriat dan te vawnhim anih theih nan a hmalatu Physics Dept., MZU leh Mizoram Science Centre te chu fakawm a tih thu a sawi. Science Centre chu theih tawp chhuaha tan la chhunzawm zel tura chahin thangthar te zingah Arsi chanchin leh Van thengreng chanchin zir chakna tuh tura hma la zel turin a chah.

Governor chuan, "Tunlai thangtharte chu digital media leh internet hmangin thil thar chi hrang hrangin an nun a deng mek a, hetih lai hian mahni hnambil zia-rang leh pawmdante vawnthata hlanchhawn anih zel theihna turin upa zawk te leh zirtirtu ten mawh an phur a, tan an lak a ngai," a ti bawk.

He International Symposium-ah hian Keynote Speaker atan Dr. Martin George, Principal Astronomer, Hive Planetarium, Tasmania, Australia and Chair of International Development, International Planetarium Society chuan sawm anih angin a hmanpui bawk.

Symposium hawnna inkhawmah hian Dr. Martin George, Australia pawhin thu sawiin arsite leh vansang lam chanchin chu mi zawng zawng huapzo anih thu leh mihringte thinlung nen inhnaih tak a nih thu a sawi a. Symposium buatsaihtute chu astronomy leh space science thehdarhna kawnga hmalatu pawimawh tak an ni a ti bawk.

Ni hnih awh tur he Symposium-ah hian Mizoram chhung leh pawn atangin mithiam thlanbik ten technical session vawi 4 neiin thupui zirna leh sawihona hun an hmang dawn a. Dr. Martin George pawhin zirlaite hmaah astronomy tihlarna turin thupui a sawi bawk ang. Symposium hi Mizoram Science Centre Berawtlang-ah chhunzawm a ni anga. Dr. Martin George kawmna leh Planetarium tlawhnate neih a ni bawk dawn a ni.