Aizawl : Guwahati Mizo Welfare Association (GMWA) te chuan nimin khan thuchhuah an siam a, Guwahati khawpui leh a chhehvelah dan lova sumdawng leh mi bum ching an tam hle tih an sawi a, tun chinah chuan heng thil te avanga buaina tawk te chu an tanpui tawh loh tur thu leh police hnenah an hlan tawh thin tur thu an tarlang. 

GMWA chuan Pawisa lem hmanga sumdawng, Ailaidum hralh thin leh Rangkachak leh Ruihhlo hmanga sumdawng te bakah vaiho thurualpui a, mi bum ching an tam hle tih an sawi. Heng hmanga sumdawng thin ho hian chhuanlam atan Motor secondhand lei, motor part lei, company-a thawk tur te chu he hmun an pan chhan chhuanlamah an hmang thin thu an sawi a. Buaina an tawh hnuah an thil tih an hriat leh thin avangin a thinrim thlak thin hle tih an sawi bawk.

He thil tha lo tak hi social media (facebook, whattsapp etc) atanga intanin, vai hoin tawkdarh awhawm tak tak siamin Mizo tam tak an bum thla thin, an ti a. Heng an bum mai theih te hi a tam zawk chu thingtlang mi an ni thin, tiin Aizawl mi, lehkha thiam sang tak tak, fin hmel pui pui pawh an tel fo niin an sawi a, cheng nuai tam tak keng thla-a, kut bêng thaka bum tawk te an awm thin an ti bawk.

Mihring in-kidnap-na hial te pawh a thleng thin, tiin Mizote buma vehthlêmtu zingah hian vai thurualpuitu Mizo an tel ngei bawka an hriat thu leh an chhui mek tih an sawi a, an hriat chhuah chuan an chungthu a rip hle dawn tih an an ti a. GMWA chuan Guwahati bakah Mangoldai leh Nagaon te chu hetiang thlenna thin hmun a nih thu an sawi.

Thianghlim taka khual zin leh damlo mangang harsatna tawkte chuan GMWA hruaitute leh Dy. Resident Commissioner (Mizoram House) te pan inthlahrung lo tur leh phone hmang pawha be pawp mai turin Mizo mipuite an ngen tih an sawi.