November 15, 2022; Hachhek Bial Kuhva Chingtu Pawl (HBKCP) chuan vawi tam tak Mizoram sawrkarah kuhva chingtuten an harsatna an thlen tawh hnu pawha tun thlenga thu lawmawm an la hriat loh avangin naktuk zing dar 6 atangin an huamchhungah thu leh awm hma total bandh an huaihawt dawn.

HBKCP ten thuchhuah an siam a tarlan a nih danin, HBKCP leh Jampui Mizo Convention, Tripura huaihawt, kuhva chingtute General Body Meeting YMA Run, Kawrthah a nimin a neih chuan Mizoram sawrkarin dan lova  kuhva lakluh a tih tawp duhloh avang leh Mizoram chhunga  godown tam tak la awm reng chu Mizoram sawrkar in a mit a siai khum tlat avangin Mizoram chhunga kuhva chingtute leh Tripura lama kuhva chingtute harsatna a thlen mek ni in a hria a, pawi a ti tak zet tih an tarlang.

Mizoram sawrkar chu Ministry of Home Affairs, Govt of India thupek zawma dan lova kuhva Mizoram chhunga lakluh thin ti tawp thuai tur leh dan phal loh kuhva godown awm zawng zawng te pawh ti chhia a, he smuggling sumdawna tenawm tak, kuthnathawktute ti beidawng mek tute hi a rang thei ang bera man chhuak turin Mizoram sawrkar an phut a ni.

HBKCP leh Hachhek bial chhunga VC te leh pawl hrang hrangte huaihawtin an kuhva tharte hralh a nih theih nana hmala tura sawrkar karna tan tun thla ni 2 atang khan an bial chhunga sawrkar hnathawk pisa kai turte an lo dang tawh. 

An Resolution

1. Mizoram Sorkar hian Mizoram leh Tripura, Jampui Tlangdung kuhva chingtute harsatna min siam tu, kuhva smuggling a inhnamhnawih zawng zawng te Ministry of Home Affairs,  Govt of India thu angin man chhuak a, an phu tawk hremna pe turin leh Mizoram chhunga dan phal loh kuhva la awm zawng zawng te pawh ti ral vek turin Mizoram sawrkar kan ngen a ni.

2. Hachhek bial mipui te hian kuhva huan siam hi kan eizawnna bul ber a ni tih kan sawrkar in min hriatpui angin kan harsatna kan thlen leh ngenna te,  kan duhna te min tih hlawhtlin sak hma loh chuan Hachhek Constituency huam chhungah sawrkar hian eng programme mah siam rih lo se kan ti.